އީރާނަކަށްވެސް އަދި އިސްލާމީ އެހެން ޤައުމުތަކަށްވެސް، އެއްވެސް ވަރަކަށް ދައްޖާލީ އިޒުރޭލުގެ ނުބައިކަމާއި، މަކަރުވެރިކަން ދަސްވެފައެއް ނުވެއެވެ. އެހެންނޫން ނަމަ، ރައްކާތެރިކަމުގެ ފިޔަވަޅުތަކާއި ނުލައި، ވެރިކަމުގެ ބާރުތަކުގެ އެންމެ މަތީފަށަލައިގެ އިސްވާރުންތަކެއް އެއްތަނަކަށް އެއްވެ، ދިފާޢީ ކައުންސިލުގެ ބައްދަލުވުމެއް ބާއްވަންވީ ކީއްވެގެން ހެއްޔެވެ؟
ހަ ފަރާތުން ދިޔައީ ހަނގުރާމައިގެ ބެރު ޖަހަމުންނެވެ. ޑޮނަލްޑް ޓްރަމްޕު ދިޔައީ، ސީދާ ޢަލީ ޚާމަނާއީގެ “ލައިވް ލޮކޭޝަން” ނުވަތަ އެ އިރަކު ހުންނަވާތަން، ވަގުތުން ވަގުތަށް ހާމަކުރެވިދާނެ ކަމަށް ބުނަމުންނެވެ. ވީމާ، އީރާނުން ރައްކާތެރިކަމުގެ ފިޔަވަޅުތައް އަޅާފައި ނުވަނީ ކީއްވެގެން ހެއްޔެވެ؟ މި ސުވާލުތަކުގެ ޖަވާބު ވަރަށް ސާފެވެ. އިޒުރޭލުގެ ޖާސޫސީ އިދާރާ މޮސާޑުން ވަނީ އީރާނުގެ ވެރިކަމުގެ އެންމެ އެތެރޭގެ ފަށަލަތަކުގެ ތެރެއަށް ފުންކޮށް ވަދެފައެވެ. ބައެއް ފަރާތްތަކުން ބުނެފައިވާ ގޮތުގައި، މޮސާޑުގެ އޭޖެންޓުން ވަނީ، އާޔަތު الله ޢަލީ ޚާމަނާއީއާ ގާތް ގުޅުމެއް ބާއްވައިގެން، އޭނާގެ އަމިއްލަފުޅު ތަކެތިވެސް ވަގަށް ނަގާފައެވެ. މިއީ، ރަމުޒީ ނުވަތަ ޙަޤީޤީ މެސެޖަކަށް ވިޔަސް، އެ މެސެޖުން ހާމަކޮށްދެނީ މޮސާޑުގެ އޭޖެންޓުން، އީރާނުގެ ވެރިކަމުގެ ނިޒާމު ތަސްވީތު ކޮށްފައިވާ މިންވަރެވެ.
ޙަޤީޤަތަކީ އީރާނުގެ ވެރިކަމުގެ ނިޒާމުގެ ތެރެއަށް، މޮސާޑުގެ ޖާސޫސުން ވަނީ ވަރަށް ބޮޑަށް ވަދެފައެވެ. ޚުދު އީރާނުގެ އިންޤިލާބީ ގާޑުންގެ ތެރޭގައިވެސް، އިޒުރޭލަށް މަޢުލޫމާތު ފޯރުކޮށްދޭ ޖާސޫސުން ދަނީ ޙަރަކާތްތެރި ވަމުންނެވެ. އެގޮތުން ހިޒުބު الله ގެ އިސްވާރު ޙަސަން ނަސްރު الله އާއި، ހިޒުބު الله ގެ އިސްދާނަކަމުގެ ތެރޭގައި ހިމެނޭ އެހެން ފަރާތްތަކަށް ފާއިތުވި ދެ އަހަރެއްހާ ދުވަހުގެ ތެރޭގައި ކުރިމަތިވި ހިތާމަވެރި ޙާދިސާތަކުންވެސް ދައްކުވައިދެނީ ހަމަ އެއް މަންޒަރެކެވެ.
އެމެރިކާގެ ރައީސް “ކުޑަކުދިންގެ ޚާއްޞަ ޑޮކްޓަރު” ޑޮނަލްޑް ޓްރަމްޕް އަމިއްލައަށް ވެސް ފޮނިކަނޑަމުން ބުނެފައިވަނީ އީރާނުގެ ސުޕްރީމް ލީޑަރަށް “އަހަރެމެންގެ ޖާސޫސީ މަޢުލޫމާތާއި، ތަޖުރިބާކާރު ޓްރެކިން ނިޒާމުތަކުން ދުރުހެލިވާން ނުކުޅެދިފައިވާ” ކަމަށެވެ. ޓްރަމްޕު އިޝާރާތަކީ، އެއީ ކުރިއަރާފައިވާ ސަރވޭލަންސާއި، ފޯނު ޓްރެކިންގއާއި، އެކިތަންތަނުގައި ހަރުކޮށްފައިވާ އާލާތްތަކާއި، އަދި އީރާނުގެ އިސްވާރުންނާއި ގާތް ގުޅުން އުފައްދާފައިވާ އިންސާނީ މަސްދަރުތަކެވެ. އެ ފެންވަރަށް އީރާނުގެ ވެރިކަމުގެ ނިޒާމުގެ އެންމެ އެތެރެއަށް ވަދެގަތުމަކީ އެކްސިޑެންޓެއްގެ ސަބަބުން ދިމާވާނެ ކަމެއް ނޫނެވެ. އެކަމަށް ބޭނުންވަނީ، އީރާނުގެ ވެރިކަމުގެ އެތެރޭގެ ފަށަލައިގައި ހިމެނޭ މީހުންނެވެ.
އީރާނުން މީގެ ކުރިން ވަނީ މޮސާޑަށް އެއްބާރުލުންދޭ ފަރާތްތަކާއި، އެތެރޭގެ ލީކްތައް ފައިދާހުރި ގޮތެއްގައި ނައްތާލުމަށް ދަތިތަކެއް ކުރިމަތިވެ، އޭގެ ނަތީޖާއެއްގެ ގޮތުން އެކަމަށް އީރާނުން ވަނީ ބޮޑު އަގެއް ދައްކާފައެވެ. އެގޮތުން، މަތިންދާބޯޓު ޙަމަލާތަކާއި، މިސައިލް ހަމަލާތަކުގައި އީރާނުގެ އިސް ކޮމާންޑަރުންނާއި، މަތީ ފަންތީގެ އެތައް އޮފިޝަލުންނެއް ވަނީ ޝަހީދުވެފައެވެ. އެހައި އަޑިއަށް ޖާސޫސުން ވާސިލްވުމުން، ހަނގުރާމައިގެ މައިދާނަކީ ހަމައެކަނި ބޭރުފުށުގެ މައިދާނެއް ނޫނެވެ. އެއީ ސީދާ “ގޭތެރޭގެ” މައްސަލައެކެވެ. ވީމާ ފުރަތަމަ ހަނގުރާމަ ކުރަންޖެހޭނީ އެތެރޭގައި ވަކިހިއްޕައިގެން ތިބި ޚާއިނުންނާއެވެ. އިސްލާމީ އުއްމަތަށް ބަލައިލާއިރު، އެ އުއްމަތުގެ ކޮންމެ ދިމާލަކުން ފެންނަނީ، މުނާފިޤުކަމާއި، ދޮގުވެރިކަމާއި، އަދި ޚިޔާނާތެވެ.
