ޖަރުމަނު ކަޕްގެ ފައިނަލުގައި ރޭ އާރްބީ ލިޕްޒިގު އާއި ޖަރުމަން ލީގުގެ ޗެމްޕިއަން ބަޔާން މިއުނިކް ބައްދަލުކުރި މެޗު ފަސޭހަ ކަމާއި އެކީ ކާމިޔާބުކޮށް ބަޔާން މުބާރާތުގެ ތަށި އުފުލާލައިފިއެވެ.
ޖަރުމަނު ކަޕްގެ ފައިނަލުގައި ރޭ ކުޅުނު މިމެޗު އާރްބީ ލިޕްޒިގު ބަލިކޮށް ބަޔާން ޗެމްޕިއަންކަން ހޯދީ ރޭ ކުޅުނު މިމެޗު 3-0 ލަނޑުން ކާމިޔާބުކޮށްގެންނެވެ.
ދެ ޓީމްގެ ފަރާތުން ވާދަވެރި މޮޅު ކުޅުމެއް ފެނިގެންދިޔަ މިމެޗުގައި ބަޔާން ގެ ފުރަތަމަ ލަނޑު މެޗުގެ 29 ވަނަ މިނެޓްގައި ރޮބަޓް ލެވަންޑޯސްކީ ކާމިޔާބުކޮށްދިންއިރު މިހާފްގައި ދެ ޓީމްގެ ފަރާތުންވެސް ވަނީ ލަނޑު ޖަޙާނެ ގިނަ ފުރުސަތުތަކެއް ހޯދާފައެވެ.
ރޭގެ މެޗުގެ ފުރަތަމަ ހާފް 1-0 ލަނޑުން ބަޔާން ކުރީގައި އޮވެ ނިމުނުއިރު ބަޔާނުން ވަނީ ދެވަނަ ހާފްގައި މޮޅު ކުޅުމެއް ދައްކައި ިހާފްގައި ދެ ލަނޑު ކާމިޔާުކޮށްފައެވެ.ބަޔާންގެ މި ދެ ލަނޑުގެ ތެރެއިން ފުރަތަމަ ލަނޑު މެޗުގެ 78 ވަނަ މިނިޓްގައި ފްރާންސްގެ ޒުވާން މިޑްފީލްޑަރު ކިންގްސްލީ ކޯމަން ކާމިޔާބުކޮށްދިންއިރު ބަޔާންގެ ފަހު ލަނޑު ކާމިޔާބުކޮށް ދީފައިވަނީ މެޗުގެ 84 ވަނަ މިނިޓްގައި ލެވަންޑޯސްކީއެވެ.
ރޭގެ މެޗުގައި ބަޔާނުން ވަނީ އަނިޔާގެ ސަބަބުން ކުޅުމާއި ދުރުގައި ހުރި އެޓީމުގެ އެއް ނަންބަރު ގޯލްކީޕަރު މެނުއެލް ނޯޔާ 14 މަސް ދުވަސް ފަހުން ފުރަތަމަ އެގާރައިގައި ހިމަނައިފަ އެވެ.
ރޭ ބަޔާންއާ އެކު ހޯދި ކާމިޔާބީއާ އެކު ކޮވަޗް ވެފައިވަނީ ޖަރުމަނު ކަޕް ޖެހިޖެހިގެން ތަފާތު ދެޓީމެއްގައި ކާމިޔާބުކުރި ފުރަތަމަ ކޯޗަށެވެ. މިދިޔަ ސީޒަނުގައި ކޮވަޗް ޖަރުމަނު ކަޕް ކާމިޔާބުކުރީ އެއިންޓްރަކް ފްރެންކްފާޓްގެ ކޯޗެއްގެ ގޮތުގައި ހުރެ މިހާރުގެ ކުލަބް ބަޔާން ބަލިކުރުމަށްފަހު އެވެ.
ރޭގެ މި ތައްޓާއި އެކު ބަޔާނުގެ ކޯޗު ނިކޯ ކޮވަޗް އަށް މިހާރު ވަނީ މަގާމުގައި ދެމިހުރުމުގެ ޔަގީންކަން ލިބިފައެވެ. ކޮވަޗްގެ ފުރަތަމަ ސީޒަނުގައި ބަޔާނުގެ ފެށުން ގޯސްވި ނަމަވެސް އެޓީމުން ވަނީ ސީޒަނުގެ ފަހު ބައިގައި މޮޅު ކުޅުމެއް ދައްކައިފައެވެ.
ސީޒަންގެ ބޮޑުބައި ގޯސްކޮށްދިޔަ ބަޔާން ޖެހިޖެހިގެން ހަތްވަނަ ފަހަރަށް ޖަރުމަނު ލީގު ކާމިޔާބުކުރީ މިދިޔަ ޑިސެމްބަރު މަހާއި ހަމައަށް ބޮޑު ލީޑެއްގައި އޮތް ބޮރޫޝިއާ ޑޯޓްމަންޑް ފަހަތަށް ޖައްސާލުމަށްފަހު އެވެ.
