ސައުތް އޭޝިއަން ޓްރެވަލް އެވޯޑްސް (ސަޓާ އެވޯޑްސް)އަށް އޮންލައިންކޮށް ކުރިމަތިލުމުގެ ފުރުސަތު ހުޅުވާލައިފި އެވެ.
މިދިޔަ އޭޕްރީލް މަހުގެ 30 ވަނަ ދުވަހުން ފެށިގެން މި އެވޯޑަށް ނަން ހުށަހެޅުމުގެ ފުރުސަތު ހުޅުވާލާފައިވާއިރު އޮންލައިންކޮށް އެވޯޑަށް ކުރިމަތިލުމުގެ ފުރުސަތު އަންނަ ޖުލައި މަހުގެ 10 ވަނަ ދުވަހާ ހަމައަށް އޮންނާނެ ކަމަށް މި އެވޯޑް ހަފްލާ އިންތިޒާމުކުރާ ހައިރައިޒުން ވަނީ ބުނެފައެވެ. މިއަހަރުގެ މިއެވޯޑުގައި 10 ސެގްމަންޓަކުން 37 ކެޓަގަރީއަކުން އެވޯޑް ދިނުމަށް ހަމަޖެހިފައިވާއިރު މީގެތެރޭގައި ފަތުރުވެރިކަމުގެ ދާއިރާގައި ހަރަކާތްތެރިވާ ސިޓީ ހޮޓާ، ރިސޯޓް އަދި ސަފާރީ އުޅަނދުތައް ހިމެނެ އެވެ.
ޓޫރިޒަމް ދާއިރާގައި ހިދުމަތް ދޭ ފަރާތްތަކަށް ވާދަކުރެވޭ، މިއަހަރުގެ ސައުތު އޭޝިއަން ޓްރެވެލް އެވޯޑްސްގެ ގާލާ ބޭއްވުމަށް ހަމަޖެހިފައިވަނީ ސެޕްޓެމްބަރު މަހު ސްރީލަންކާގަ އެވެ.
ސައުތު އޭޝިއަން ޓްރެވަލް އެވޯޑްސް (ސަޓާ) އަކީ ރާއްޖޭގެ މަޝްހޫރު އިވެންޓްސް މެނޭޖްމެންޓް ކުންފުނި ހައިރައިޒްގެ ބައިނަލްއަގުވާމީ ބްރޭންޑެކެވެ. ސަޓާ އެވޯޑްސް އެންމެ ފުރަތަމަ ބާއްވާފައިވަނީ 2016 ވަނަ އަހަރު، ސްރީލަންކާގެ މައުންޓް ލެވީނިއާ ހޮޓެލްގައެވެ.
އޭޝިއާގެ ގައުމުތަކުގެ ރިސޯޓުތަކާއި ހޮޓާތަކަށް އެކި ބައިތަކުން އެވޯޑް ދިނުމަށް ކޮންމެ އަހަރަކު ބާއްވާ މި އެވޯޑް ހަފްލާ 2017 ވަނަ އަހަރު ބާއްވާފައިނީ ރާއްޖޭގެ އެންމެ ދެކުނުން އައްޑޫ ސިޓީގައެވެ.
