ދިވެހިރާއްޖޭގެ ރައްޔިތުންނަށް ބެހުމަށްޓަކައި ސަޢޫދީ ޢަރަބިއްޔާގެ ސަރުކާރުން ހަދިޔާކޮށްފައިވާ ކަދުރު ބެހުމަށް ހަމަޖެހިފައިވާ އުސޫލު މިނިސްޓްރީ އޮފް އިސްލާމިކް އެފެއާޒްއިން އާންމުކޮށްފިއެވެ.
އެ މިނިސްޓްރީންކޮށްފައިވާ އިއުލާންގައި ބުނީ މީހުން ދިރިއުޅޭ ގޭބިސީތަކުގެ ޢަދަދު ބެލުމަށްފަހު 2018 ވަނަ އަހަރު އެ މިނިސްޓްރީގެ ފަޤީރުންގެ ދަފްތަރުގައި ރަޖިސްޓްރީކޮށްފައިވާ ކޮންމެ ގޭބިސީއަކަށް 1 ޕަކެޓް ކަދުރު ދިނުމަށް ނިންމާފައިވާ ކަމަށެވެ. މިގޮތުން ފަޤީރުންގެ ގޭބިސީތަކަށް ކަދުރު ބެހުމަށްފަހު، ބާކީ ކަދުރު ބަހާނީ އެންމެ ފުރަތަމަ އަންނަ ފަރާތްތަކަށް ފުރަތަމަ އިސްކަންދޭ އުޞޫލުން ކޮންމެ ގޭބިސީއަކަށް 1 ޕެކެޓް ކަދުރު ކަމަށް މިނިސްޓްރީންވަނީ ބުނެފައެވެ.މިނިސްޓްރީންކޮށްފައިވާ އިއުލާނުގައި ބުނީ ގޭބީސީތަކަށް ކަދުރު ބަހާނީ، އެ ގޭބީސީއެއްގެ ސައްޙަކަން އަންގައިދޭ ލިޔުމެއް ގެނައުމުން، އެ ލިޔުމުގެ ސައްޙަކަމަށް ބެލުމަށްފަހުގައި ކަމަށެވެ.
މާލެއާއި، ވިލިމާލެ އަދި ހުޅުމާލޭގައި ދިރިއުޅޭ ރައްޔިތުންނަށް ކަދުރު ބެހުން މާލެ ސިޓީ ކައުންސިލްގައި ކުރިއަށް ގެންދިއުމަށް ހަމަޖެހިފައިވާއިރު ރަށްރަށަށް ނުވަތަ އަތޮޅުތެރެއަށް ކަދުރު ބަހާނީ، އަތޮޅު ކައުންސިލްތަކުންނާއި، ރަށު ކައުންސިލްތައް މެދުވެރިކޮށެވެ.
މީގެ އިތުރުން މިނިސްޓްރީން ބުނީ ސަޢޫދީ ޢަރަބިއްޔާއިން މިއަހަރު ލިބުނު ކަދުރު ފަޤީރުންގެ ގޭބިސީތަކަށް ބެހުމަށްފަހު، ކޮންމެ 100 ގޭބިސީއަކަށް ޖެހެނީ 30 ޕަކެޓް ކަދުރުކަމަށެވެ.
