ތުތި ބޯވަ ދިލަމަހުހެ މަސްވެރިކަން ކުރުމަށް ބޭނުންވާ ސާމާނު އަނެއްކާވެސް ދޫކުރަން ސަރުކާރުން ނިންމައިފިއެވެ.
ފިޝަރީޒް މިނިސްޓްރީން އިންވަނީ ތުތިބޯވަ ދިލަމަހުގެ މަސްވެރިކަން ކުރުމަށް ބޭނުންވާ ސާމާނު ބެލުމަށް ބޭނުންވާ މީހުން ހުޅުމާލޭގެ އިންޑަސްޓްރިއަލް އޭރިޔާގައި ހުންނަ ފެޑް ސެންޓަރަށް ދިއުމަށްއެދިފައެވެ. މިގޮތުން ސަރުކާރު ބަންދުނޫން ކޮންމެދުވަހެއްގެ ހެނދުނު 9:00 އިން 12:00 އާ ދެމެދު ދިޔުމުން މިސާމާނު ފެންނާނެ ކަމަށެވެ.
އަދި އެސާމާނު ބޭނުންވާ މީޙުން އަންނަ ޖޫން މަހުގެ 16 ވަނަ ދުވަހުގެ ކުރިން އެކަމަށް އެދުމުގެ ފުރުސަތުވެސް މިނިސްޓްރީ އިން ވަނީ ހުޅުވާލާފައެވެ.
މިއީ ފަސްއަހަރު ދުވަހުގެ ތެރޭގައި އަގު އަންބުރާ ދައްކަންޖެހޭ ގޮތަށް ދޭ ސާމާނުތަކެވެ. މިޕްރޮގްރާމްގެ ދަށުން ތުތިބޯވަ ދިލަމަހުގެ މަސްވެރިކަން ކުރުމަށް ބޭނުންވާ 10 ސެޓް ދޫކުރުމަށްވަނީ ހަމަޖެހިފައެވެ. މަހުން މަހަށް ފައިސާ ދައްކާ އުސޫލުން ފޯރުކޮށްދޭ އެސެޓުގެ އަގަކީ 249،000 ރުފިޔާއެވެ.
ރާއްޖޭގެ މުޅިން އަލަށް ފަށާފައިވާ ތުތިބޯވަ ދިލަމަހުގެ މަސްވެރިކަމަކީ ވަރަށް ބޮޑު ތަރުހީބު ލިބޭނެ އަދި ބޮޑު ފާއިދާއެއް ލިބޭނެ މަސްވެރިކަމެއް ކަމަށް ފިޝަރީޒް މިނިސްޓްރީން ބުނެއެވެ.
