ޔުއެފާ ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުގައި ރޭ އަމިއްލަ ދަނޑުގައި ޕޯޓޯ އަތުން މޮޅުވެ ލިވަޕޫލް ސެމީ ފައިނަލުގެ ޖާގައަކާ ގާތަށް ޖެހިލައިފި އެވެ.
ލިވަޕޫލްގެ އެންފީލްޑް ސްޓޭޑިއަމްގައި ކުޅުނު މެޗު 2004 ވަނަ އަހަރުގެ މިމުބާރާތުގެ ޗެމްޕިއަންގެ މައްޗަށް 2005 ވަނަ އަހަރުގެ ޗެމްޕިއަން ލިވަޕޫލުން ކާމިޔާބު ކުރީ 2-0 ލަނޑުގެ ނަތީޖާ އަކުންނެވެ.
މިދިޔަ އަހަރު މިމުބާރާތުގެ ފައިނަލުން ސްޕެއިންގެ ރިއަލްމެޑްރިޑް އަތުން ބަލިވި ލިވަޕޫލުން ރޭގެ މެޗުގައި މޮޅު ކުޅުމެއް ދައްކާފައިވާއިރު އެ ޓީމުން ވަނީ ފުރަތަމަ 25 މިނިޓް ތެރޭ ދެ ގޯލު ޖަހައިފަ އެވެ. ރޭގެ މެޗުގައި ލިވަޕޫލްގެ ފުރަތަމަ ލަނޑު މެޗުގެ ފަސް ވަނަ މިނިޓްގައި ޖެހި ގިނީގެ މިޑްފީލްޑަރު ނަބީ ކެއިޓާ ކާމިޔާބުކޮށްދިން އިރު ލިވަޕޫލްގެ ދެވަނަ ލަނޑު މެޗުގެ 25 ވަނަ މިނިޓްގައި ކާމިޔާބުކޮށްދިނީ ރޮބާޓޯ ފިރްމީނޯ އެވެ.
މި މެޗުގައި ލަނޑު ޖަަހަން ޕޯޓޯ އަށް ވެސް ރަނގަޅު ފުރުސަތުތަކެއް ލިބިގެންދިޔަ އެވެ. އެ ގޮތުން އެންމެ ހުސް ފުރުސަތުތައް ލިބުނީ މޫސާ މަރޭގާ އެވެ. އޭނާ ޖެހި އެއް ބޯޅަ ލިވަޕޫލްގެ ކީޕަރު އެލިސަން ބެކާ ވަނީ މަތަކޮށްފަ އެވެ. މިދިޔަ އަހަރުގެ ފައިނަލުން ބަލިވި ލިވަޕޫލް ރޭގެ މެޗުން ހޯދި މޮޅަކީ އެ ޓީމުގެ ކޯޗު ޔާގެން ކްލޮޕްގެ ކޯޗިން ކެރިއަރުގައި ލިބުނު 400 ވަނަ މޮޅެވެ.
ރޭގެ މެޗަށް ފަހު ލިވަޕޫލްގެ ކޯޗު ކްލޮފް ބުނީ މިމެޗުން މޮޅުވި ނަމަވެސް ސެމީގެ ޖާގަ އަދި ޔަގީންނުވާ ކަމަށާއި ދެވަނަ ލެގުގައި ޕޯޓޯއަށް ވެސް މޮޅުވެގެން ސެމީއަށް ދިއުމުގެ ފުރުސަތު އަދި އެބަ އޮތް ކަމަށެވެ.
މި ދެ ޓީމުވެސް ކުޅޭ ދެ ވަނަ ލެގް މެޗު އޮންނާނީ މި މަހުގެ 17 ވަނަ ދުވަހުގެ ރޭ ގައެވެ. އެ މެޗު ކުޅޭނީ ޕޯޓޯގެ ޑޫ ޑްރަގާއޯ ސްޓޭޑިއަމްގަ އެވެ.
