ބޮލީވުޑްގެ މަޝްހޫރު ތަރި ސަލްމާން ޚާން ފުރަތަމަ ފަހަރަށް ބިރުވެރި ފިލްމެއް ޕްރޮޑިއުސް ކުރަން ނިންމައިފި އެވެ. މިއީ އޭނާ ފިލްމީ ދާއިރާއަށް ފުރަތަމަފަހަރަށް 1988 ގައި ނިކުތުމަށް ފަހު ޕްރޮޑިއުސް ކުރާ ފުރަތަމަ ބިރުވެރި ފިލްމުވެސްމެއެވެ.
ފިލްމީ ހަބަރުތައް ގެނެސްދޭ ނޫސްތަކުން ބުނި ގޮތުގައި ބިރުވެރި ފިލްމެއް ހެދުމަށްޓަކައި ސަލްމާން ވަނީ “އާދަމްޙޯރް” ގެ ނަމުގައި ނަން ވެސް ރަޖިސްޓްރީކޮށްފަ އެވެ. އެކަމަކު މި ފިލްމާ ބެހޭ އެއްވެސް ތަފުސީލެއް އަދި ހާމައެއް ނުކުރެ އެވެ.
ސަލްމާން އެންމެ ފަހުން ޕްރޮޑިއުސްކޮށް ގެނެސް ދިން ފިލްމަކީ މިދިޔަ މަހު ރިލީޒް ކުރި ލޯބީގެ ފިލްމު “ނޯޓްބުކް” އެވެ. އޭނާ މިހާރު “ދަބަންގް 3” ގެ މަސައްކަތް ކުރަމުން އަންނަ އިރު، އެންމެ އަވަހަށް ދެން ސްކްރީނުން ފެންނާނީ އަންނަ ފިތުރު އީދުގައި ރިލީޒް ކުރާ “ބާރަތު” އިންނެވެ.
ސަލްމާން ޚާން ފުރަތަމަ ބެލުންތެރިންނަށް ފެނިގެން ދިޔަ ފިލްމަކީ 1988 ގައި ނެރުނު ބިބީ ހޯތޯ އޭސޭ އިންނެވެ. އޭގެ ފަހުން މިއަދާ ހަމަޔަށް އެތައް ކާމިޔާބު ފިލްމަކުން އޭނާ ވަނީ ފެނިފަ އެވެ. ސަލްމާން އަކީ ފިލްމު ކުޅުމުގެ އިތުރަށް ފިލްމު އުފައްދާ ވެސް މީހެކެވެ. އެގޮތުން ދެފަހަރެއްގެމަތިން އޭނަޔަށް ވަނީ ފިލްމު އުފެއްދުމުގެ ބައިން ގައުމީ ފިލްމް އެވޯޑް ލިބިފައެވެ.
