ނޮވެމްބަރ 10 ވަނަ ދުވަހު މަރަދޫ ފަތާ ސަރަޙައްދު ސާފުކުރާ ގޮތަށް އެމެ.އެން.ޑީ.އެފް އިން ނިންމައިފިއެވެ.
އެމް.އެން.ޑީ.އެފް ގެ ސަދަރަން އޭރިއާއިން އިސްނަގައިގެން ކުރިއަށް ގެންދިޔުމަށް ހަމަޖެހިފައިވާ މިހަރަކާތް ފެށުމަށް ހަމަޖެހިފައިވަނީ އެދުވަހުގެ ހެނދުނު 09:00 ގައެވެ. އެގޮތުން ފަތާ ސަރަހައްދުގެ މޫދާއި، ގޮނޑުދޮށާއި، އެސަރަޙައްދު އެއްކޮށް ސާފުކުރުމަށް ހަމަޖެހިފައިވެއެވެ.
މިހަރަކާތުގައި އެމް.އެން.ޑީ.އެފްގެ އިތުރުން އަކްއެންޗަރ ޑައިވް ސެންޓަރ އިން ވެސް އަމަލީގޮތުން ބައިވެރިވެއެވެ. އަދި މިހަރަކާތް އެފަރާތުން ކުރިއަށް ގެންދާއިރު އެހީތެރިކަން ފޯރުކޮށް ދިނުމަށް ބޭނުންފުޅުވާ އެންމެހައި ފަރާތްތަކަށް އެފުރުސަތު ވަނީ ހުޅުވާލައިފައިވެއެވެ. އެގޮތުން ފީނައިގެން ކުރަންޖެހޭ މަސައްކަތްތަކަށް ބޭނުންވާ އާލާތްތައް އިންތިޒާމް ކުރާ ފަރާތުން ފޯރުކޮށްދޭ ގޮތަށް ހަމަޖެހިފައި ވެއެވެ.
އެހެންކަމުން މިފަދަ ދަރުމަވެރި މަސައްކަތެއްގައި ވީހާވެސް ގިނަ ފަރާތްތަކުން ބައިވެރިވެލެއްވުމަކީ އިންތިޒާމް ކުރާ ފަރާތުގެ ވަރަށް ބޮޑު އެދުމެކެވެ. މަރަދޫ ފަތާ ސަރަހައްދަކީ ވަރަށް ގިނަ މީހުން ފަތަން ދަސްކުރުމަށް ބޭނުންކުރާ ތަނެކެވެ.
މީގެ ކުރިންވެސް މިފަދަ ޕްރޮގްރާމްތައް އެމް.އެން.ޑީ.އެފްގެ ސަދަން އޭރިއާއިން އިސްނަގައިގެން ކޮށްފައިވާކަން ފާހަގަ ކުރެވެއެވެ.
