ރައްޔަތުންގެ މަޖިލީހުގެ އަގުލަބިއްޔަތު ލިބޭ ގޮތަކަށް އިދިކޮޅު ކޯލިޝަންގެ ޕާޓީތައް އެއްބަސްވުން ވަރަށް މުހިންމު ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ
މިއަދު އަދާލަތު ޕާޓިގެ މެންބަރުންނާ މުހާތަބު ކުރައްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ މަޖިލިސް އިންތިހާބަށް ޕާޓީތަކުގެ މެދުގައި ގޮތްތަކެއް ވީއެންމެ އަވަހަކަށް ނިންމަން ޖެހޭ ކަމަށާއި މަޖިލީސް އިންތިހާބު ވަރަށް މުހިއްމު ކަމުގައެވެ
މީގެ އިތުރުން ނަޝީދު ވިދާޅުވީ އެމްޑީޕީގެ ގަވައިދުތައް ހުރި ގޮތުން ޕްރައިމަރީ ބާއްވަން ޖެހޭ ކަމަށާއި ޕްރައިމަރީތައް ބާއްވަން އެމަނިކުފާނު ވެސް އެދިވަޑައިގަންނަވާ ކަމަށެވެ. އެހެންކަމުން އެކަމަށް ވަގުތު ބޭނުންވާ ކަމާއެކު ޕާޓީތަކުގެ މެދުގައި ވީއެންމެ އަވަހަކަށް ގޮތެއް ނިންމައި އިންތިހާބަށް އެންމެ ފުރިހަމައަށް ތައްޔާރުވާން ޖެހޭކަމަށް ނަޝީދު ވިދާޅުވިއެވެ
ނަޝީދު މިހެން ވިދާޅުވެފައިވާއިރު އީސީއިން ގޮނޑި ގެއްލުވާލުމާއެކު މައްސަލަ ބޮޑުވި ރައްޔިތުންގެ މަޖިލީހުގެ 12 މެންބަރުންނަށް ޕްރައިމަރީއަކާ ނުލާ ޓިކެޓް ދިނުމަކީ މީގެކުރިން ކޯލިޝަން ޕާޓްނަރުން ނިންމާފައިވާ ނިންމުމެއްކަމަށް ވިދާޅުވެ މައުމޫން ވަނީ ޓުވިޓް ކުރައްވާފައެވެ
މީގެ އިތުރުން ނަޝީދުވަނީ އީސީ އިން ގޮނޑި ގެއްލިފައިވާކަމަށް ނިންމާފައިވާ 12 މެންބަރުންނާއި ބައްދަލުކުރައްވާ މަޝްވަރާކުރައްވާފައެވެ. އެ ބައްދަލުވުމުގައި ޕްރައިމަރީއަކާ ނުލާ 12 މެންބަރުންނަށް ޓިކެޓް ދެއްވާނެކަމުގެ ޔަގީންކަން ރައީސް ނަޝީދު ދެއްވި ކަމަަށް އެ ބައްދަލުވުމުގައި ތިއްބެވި، ބައެއް މެންބަރުން ވިދާޅުވި އިރު ބައެއް މެންބަރުން ވަނީ އެކަމުގެ މަޝްވަރާ އެ ބައްދަލުވުމުގައި ނުކުރާ ކަމަށް ވެސް ވިދާޅުވެފަ އެވެ.
