ރައްޔިތުން މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ، 45 މެންބަރުންގެ ސޮޔާ އެކު މިއަދު މަޖިލީހަށް ހުށަހަޅާނެއެވެ.
މަޖިލީހުގެ ރައީސް މަސީހުގެ މައްޗަށް އިތުބާރު ނެތް ކަމުގެ ވޯޓެއް ނަގަން މި މަސައްކަތް ކުރަނީ ވޭތުވެދިޔަ ދޮޅު އަހަރެއްހާ ދުވަހުގެ ތެރޭގައި ތިން ވަނަ ފަހަރެވެ. ފުރަތަމަ ފަހަރު ރޯލް ކޯލް ވޯޓިން އަކަށް ގޮސް މަސީހަށް އިތުބާރު އޮތް ކަމަށް ފާސްވި އެވެ. އަދި 45 މެމްްބަރުންގެ ސޮޔާ ދެ ވަނަ ފަހަރު އިތުބާރު ނެތް ކަމަށް ހުށަހެޅުމާ އެކު ސޮއިކުރި 12 މެމްބަރެއްގެ ގޮނޑި އިލެކްޝަންސް ކޮމިޝަނުން ގެއްލުވާލައި، އެ ހުށަހެޅުން ބާތިލް ވެގެން ދިޔަ އެވެ. ނަމަވެސް ސުޕްރީމް ކޯޓުން މިހާރު ވަނީ ހަތަރު މެންބަރުންގެ ގޮނޑި ސަލާމަތްކޮށްފަ އެވެ.
މަޖިލީސް މިހާރު އެތުރިފައިވާ ގޮތަށް ބަލާއިރު ޕީޕީއެމްގައި ފަޅީގައި ތިބީ 34 މެންބަރުންނެވެ. އެއީ މަސީހާއި ފާރިސް މައުމޫން ނުހިމަނަ އެވެ. އިދިކޮޅުން އެމްޑީޕީ އާއި ޖުމްހޫރީ ޕާޓީއާ އަދާލަތު ޕާޓީ އަދި ވަކި ޕާޓީއަކަށް ނިސްބަތް ނުވާ މެންބަރުން އަދި ސަލާމަތްވި ހަތަރު ގޮނޑި ހިމަނައިގެން އިދިކޮޅަށް ވެސް ލިބެނީ 36 މެންބަރުންނެވެ. އެހެންކަމުން މަސީހުގެ އިތުބާރު ނެތް މައްސަލަ ހުށަހަޅަން 45 ހަމަވާނީ ޕީޕީއެމްގެ އަށް ވަރަކަށް މެންބަރުންގެ ސޮޔާއެކުގަ އެވެ. މައުލޫމާތު ލިބޭ ގޮތުގައި މިފަހަރު މަޖިލީހުގެ ރައީސް ކަމުން މަސީހު ދުރުކުރަން ހުށަހަޅަނީ، އިދިކޮޅު މެމްބަރުންގެ އިތުރުން ޕީޕީއެމްގެ ބައެއް މެމްބަރުންގެ ވެސް ސޮޔާ އެކު އެވެ.
މަސީހްގެ މަގާމު ދިފާޢު ކުރުމަށްޓަކައި މީގެ ކުރިން މަޖިލީހުގެ 12 މެންބަރަކު ޕީޕީއެމުން ވަކި ކުރުމާއެކު މަޖިލީހުގެ މަސައްކަތްތަކަށް ބުރޫ އަރާ ޕީޕީއެމަށް ސިޔާސީ ގޮތުން ބޮޑެތި ގޮންޖެހުންތަކެއް ކުރިމަތިވިއެވެ. ހަމަ އެއާއެކު މިދިޔަ މަހު އޮތް ރިޔާސީ އިންތިޚާބު ޕީޕީއެމް އަށް ނާކާމިޔާބުވި އެއް ސަބަބަކީ ވެސް މަސީހްގެ މަގާމު ދިފާޢު ކުރަން އެޅި ފިޔަވަޅުތައް ކަމަށް ބައެއް ފަރާތްތަކުން ގަބޫލު ކުރެއެވެ.
އިދިކޮޅު ފަރާތްތަކުން ބުނަމުން ދަނީ މަސީހުގެ މައްޗަށް އިތުބާރެއް ނެތް ކަމަށާއި މަޖިލީހުގެ ޖަލްސާތައް ކުރިއަށް ދާނީ މަސީހު އެ މަގާމުން ވަކިކޮށްގެން ކަމަށެވެ. މަޖިލީހުގެ މި ދައުރު ފެށިގެން ކުރިއަށް ދާއިރު ވެސް “އެޖެންޑާ ކުރާނެ މައްސަލައެއް ނެތް” ކަމަށް ބުނެ މަޖިލީހުގެ އެއްވެސް ޖަލްސާއެއް ކުރިއަކަށް ނުދެ އެވެ.
ޖުމްހޫރީ ޕާޓީގެ ޕީޖީގެ ޑެޕިއުޓީ ލީޑަރު މީގެ ކުރިން ވިދާޅުވެފައި ވަނީ މަސީހުގެ އިތުބާރު ނެތް މައްސަލާގައި ސޮއި ހޯދުމަށް މަސައްކަތް ކުރާ ކަމަށެވެ. އަދި ޕީޕީއެމްގެ ގިނަ މެންބަރުން ވެސް ބައިވެރިވާނެ ކަމަށް އޭނާ ކުރިން ވަނީ ވިދާޅުވެފަ އެވެ. ނަމަވެސް މަސީހު އަމިއްލަފުޅަށް ރީތި ގޮތުގައި އިސްތިއުފާ ދެއްވާ ވަޑައިގަންނަވާނެ ކަމަށް އުންމީދު ކުރައްވާ ކަމަށް ރިޔާޒު ވިދާޅުވެފައިވެ އެވެ.
މައްސަލަ މިހާ ހިސާބުގައި ވަނިކޮށް ސޯޝަލް މީޑިއާގައި މަސީހު އަމިއްލަފުޅަށް އިސްތިއުފާ ދެއްވަވަން ތައްޔާރުކަމުގައި ވާހަކަތަކެއް ވަނީ ދެކެވެން ފަށާފައެވެ. މަސީހް އިސްތިއުފާ ދެއްވައިފި ކަމަށް ސޯޝަލް މީޑިއާގައި އަޑުތައް ފެތުރެމުންދަނިކޮށް މަގާމުން އިސްތިއުފާ ދެއްވަން ނިންމަވާފައިވާ ކަމަށްމަސީހްގެ ނަންފުޅުގައި ފޮނުއްވެވި މެސެޖެއް ވަނީ ސޯޝަލް މީޑިއާގައި ދައުރުވާން ފަށާފައެވެ.
“މެޖޯރިޓީ އެމްޕީ އިން އަޅުގަނޑުގެ އިތުބާރު ނެތްކަމަށް ސޮއިކޮށް އެކަން ކަށަވަރު ކޮށްދެއްވާފައިވާތީ ގާނޫނުއަސާސީގެ 82 ގެ ނޫނުގައިވާ ގޮތަށް މަޖިލީހުގެ ރައީސްކަމުން އަޅުގަނޑު އިސްތިއުފާ ދޭން ނިންމައިފިން،” އެސްއެމްއެސްގައި ބުނެފައި ވެއެވެ.
ނަމަވެސް މަގާމުން އިސްތިއުފާ ދެއްވާނީ ކޮން އިރަކު ކަމެއް މެސެޖްގައި ބުނެފައެއް ނުވެއެވެ.
މިކަމާ ގުޅިގެން ޕީޕީއެމްގެ ޕީޖީ ގްރޫޕް ލީޑަރ އަހްމަދު ނިހާން ހުސައިން މަނިކު ކުރެއްވި ޓްވީޓެއްގައި ވިދާޅުވެފައިވަނީ، މަޖިލީހުގެ ރައީސް އިސްތިއުފާ ދެއްވާނަމަ އެކަން އެސްއެމްއެސްއަކުން މީޑިއާއަށް ނުދަންނަވާނެ ކަމަށާއި، ގާނޫނުއަސާސީގެ 82 ވަނަ މާއްދާގެ ނޫނުގައިވާ ގޮތުން އެފަދަ ސިޓީއެއް ހަވާލު ކުރައްވާނީ މަޖިލީހުގެ ނާއިބް ރައީސާ ކަމަށެވެ.
މަސީހް ރައްޔިތުން މަޖިލީހުގެ މެންބަރު ކަމަށް އިންތިޚާބުވެ ވަޑައިގެންނެވީ ފުވައްމުލަކު ދެކުނު ދާއިރާގެ މެންބަރުގެ ގޮތުގައެވެ. އޭނާ މަޖިލީހުގެ ރައީސްކަމަށް ހޮވިވަޑައިގަތީ 28 މެއި 2014 ގައި ބޭއްވުނު 18 ވަނަ ރައްޔިތުންގެ މަޖިލީހުގެ ފުރަތަމަ ޖަލްސާގައި މަޖިލީހުގެ ރައީސް އިންތިޚާބު ކުރުމަށް މެންބަރުންގެ މެދުގައި ނެގެނު ވޯޓުގައި 43 ވޯޓުގެ އަޣުލަބިއްޔަތެއް ލިބިވަޑައިގެންނެވެ.
މަސީހުގެ އިތުބާރުނެތްކަމުގެ މައްސަލަ މަޖިލީހުގެ 45 މެންބަރުންގެ ސޮޔާއެކު މިއަދު އަލުން މަޖިލީހަށް ހުށައަޅަން ނިންމާފައިވާއިރު މިއީ މަޖިލީހުގެ ރައީސްގެ އިތުބާރު ނެތްކަމަށް މަޖިލީހަށް ހުށަޅާ 3 ވަނަ ފަހަރަށް ވެގެންދާނެއެވެ. ސުވާލަކީ މިހާވަރަށް އިތުބާރު ނެތް ކަމަށް މެމްބަރުން ދެކިވަޑައިގަންނަވާއިރު މަސީޙް އަމއިްލަފުޅަށް ރީތި ގޮތުގައި އިސްތިއުފާ ދެއްވުމަށްފަހު ބަލި ގަބޫލު ކުރައްވަވަން ތައްޔާރުތޯއެވެ؟.
