އުފެއްދި ތާރީހުން ފެށިގެން 20 އަހަރުވެފައިވާ އުޅަނދުތައް ނުދުއްވޭ ގޮތަށް އެއްގަމު ދަތުރުފަތުރާ ބެހޭ އާ ބިލު ރައްޔިތުންގެ މަޖިލީހުން މިއަދު ފާސްކޮށްފިއެވެ. މިއީ މަގުމަތީގެ ނިޒާމު ބޭނުންކުރާ އެންމެހައި ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް ހުށަހެޅި މުހިންމު ބިލެކެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ކުރެންދޫ ދާއިރާގެ މެންބަރު މުހައްމަދު ޝާމިން ހަބީބެވެ. މިއަދު ބޭއްވި މަޖިލީހުގެ ޖަލްސާގައި މި ބިލު ފާސްކުރީ 47 މެންބަރުންގެ އަގުލަބިއްޔަތުންނެވެ. މި ބިލުގެ މައިގަނޑު މަގުސަދަކީ އެއްގަމު ދަތުރުފަތުރުގެ ކަންކަން ހަރުދަނާ ގާނޫނީ އޮނިގަނޑެއްގެ ދަށުން ޒަމާނާ އެއްގޮތަށް ރާވައި ހިންގުމެވެ.
މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ބިލު ދިރާސާކުރުމަށްފަހު ވަނީ ބޮޑެތި ބަދަލުތަކެއް ގެނެސްފައެވެ. އޭގެ ތެރެއިން އެންމެ ފާހަގަކޮށްލެވޭ އެއް ކަމަކީ ހާއްސަ ގިންތީގެ އުޅަނދުތައް ފިޔަވައި އެހެން އުޅަނދުތަކުގެ އުމުރު ކަނޑައެޅުމެވެ. އެގޮތުން އާންމު އުޅަނދުތައް ބޭނުންކުރެވޭނީ އުފެއްދި ތާރީހުން ފެށިގެން އެންމެ ގިނަވެގެން 20 އަހަރުގެ މުއްދަތަކަށް ކަމަށް ވަނީ ފާސްކޮށްފައެވެ.
މީގެ އިތުރުން ގަވާއިދާ ހިލާފުވާ މީހުންނަށް ފިޔަވަޅު އެޅުމުގެ ގޮތުން ލައިސަންސް އިން ޕޮއިންޓް ކެނޑޭ ޑީމެރިޓް ނިޒާމެއް މި ބިލުގެ ދަށުން ތައާރަފުކުރާނެއެވެ. އަދި ޓްރެފިކް ގަވާއިދާ ހިލާފުވެގެން ކުރާ ޖޫރިމަނާގެ އަދަދު 5،000 ރުފިޔާއަށް ވުރެ ބޮޑުވެއްޖެނަމަ އެ މީހެއްގެ ލައިސަންސް ހިފެހެއްޓޭނެ ކަމަށްވެސް އާ ބިލުގައި ބަޔާންކޮށްފައިވެއެވެ.
މާލެ ސަރަހައްދުގެ ދަތުރުފަތުރުގެ ކަންކަން ބެލެހެއްޓުމަށް ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީހެއް އުފެއްދުމާއި، މިނިސްޓްރީއަށް ލަފާދޭ ރޯޑް ސޭފްޓީ އެންޑް ޓްރެފިކް މެނޭޖްމަންޓް އެޑްވައިޒަރީ ކޮމިޓީއެއް އެކުލަވާލުންވެސް މި ބިލުގައި ހިމެނެއެވެ. އަދި އިންޓަނޭޝަނަލް ޑްރައިވިން ޕާމިޓް ދޫކުރުން ފަދަ މުހިންމު ކަންކަންވެސް ބިލުގައި ހިމަނާފައިވެއެވެ.
އެއްގަމު އުޅަނދު ދުއްވުމުގެ ލައިސަންސް ދޫކުރުމާއި ޕާކުކުރުމުގެ އުސޫލުތައްވެސް މި ބިލުން އަލުން އެކަށައަޅާނެއެވެ. ކޮމިޓީން ގެނައި އިސްލާހުތަކާއެކު މަޖިލީހުން މި ބިލު ފާސްކުރުމުން، ރާއްޖޭގެ އެއްގަމު ދަތުރުފަތުރުގެ ނިޒާމު އިތުރަށް ހަރުދަނާވެގެންދާނެއެވެ.
