އައްޑޫސިޓީގެ އީކުއޭޓަރ ވިލޭޖް- ބްލޫ ލެގޫން ގައި ކުރިއަށްގެންދިޔަ 15 ވަނަ ކޯޕަރޭޓް އޭވިއޭޝަން ސެކިއުރިޓީ ޕްރޮގްރާމް، އޭޝިއާ ޕެސިފިކް (ކާސްޕް-އޭޕީ)، ގެ 15 ވަނަ ސްޓީއަރިންގ ކޮމެޓީ މީޓިންގ އަދި ހަވަނަ ރީޖަނަލް އޭވިއޭޝަން ސެކިއުރިޓީ ކޯޑިނޭޝަން ފޯރަމް، އޭޝިޔާ އެންޑް ޕެސިފިކް ރީޖަން، ބައްދަލުވުން ނިންމާލައިފިއެވެ.
ޖުލައި މަހުގެ 1 ވަނަ ދުވަހުން ފެށިގެން އިއްޔެގެ ނިޔަލަށް އައްޑޫ ސިޓީގެ އީކުއޭޓަރ ވިލެޖްގައި ކުރިއަށް ދިޔަ މި ދެ ބައްދަލުވުމުގައި ތަފާތު އެކި އޭޝިޔާ ޕެސިފިކް އަދި އޭވިޝަން ސެކިއުރިޓީ ދާއިރާއާއި ގުޅުންހުރި ޖަމިއިއްޔާތަކުން ޖުމްލަ 65 ޑެލިގޭޝަންސް ވަނީ ބައިވެރިވެފައެވެ.
ކާސްޕް-އޭޕީ އަކީ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައި.ކާ.އޯ)ގެ ސަރަހައްދީ އޭވިއޭޝަން ސެކިއުރިޓީ ޕްރޮގްރާމެކެވެ. މި ޕްރޮގްރާމުގެ ރިޔާސަތު ކޮންމެ އަހަރަކުވެސް މެންބަރު ގައުމަކުން ދާނީ ބަލަހައްޓަމުންނެވެ. އަދި އެގޮތުން މި އަހަރު މި ޕްރޮގްރާމް ސްޓިއަރިން ކޮމެޓީގެ ރިޔާސަތު ބެލެހެއްޓެވީ ރާއްޖޭގެ ފަރާތުން މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގެ މިނިސްޓަރުގެ ނައިބު ތޯރިގް އަލީ ލުތުފީއެވެ.
ކޯޕަރޭޝަން އެވިއޭޝަން ސެކިއުރިޓީ ޕްރޮގްރާމް އޭޝިއާ ޕެސިފިކް (ކާސްޕް-އޭޕީ)، ގެ 15 ވަނަ ސްޓީއަރިން ކޮމެޓީ ބައްދަލުވުން ފެށުމުގެ ރަސްމިއްޔާތުގައި ޑިފެންސް މިނިސްޓަރ އާދަމް ޝަރީފު އުމަރު ވެސް ވަނީ ބައިވެރިވެ ވަޑައިގަންނަވާފައެވެ. މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވެފައިވަނީ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަންގެ ގްލޯބަލް އޭވިއޭޝަން ސެކިއުރިޓީ އެކްޝަން ޕްލޭނަށް އަމަލުކުރުމަށްޓަކައި ދިވެހިރާއްޖޭގެ އޭވިއޭޝަން ސެކިއުރިޓީ އެކްޝަން އެކުލަވާލާ އެ ޕްލޭން ތަންފީޒުކުރަމުން ގެންދާކަމަށެވެ. އަދި މި ފަދަ ޕްރޮގްރާމުތަކުގެ އެހީތެރިކަން ރާއްޖެއަށް ވަރަށް ބޮޑަށް ލިބިގެންދާ ކަމަށާއި މި ޕްލޭން އެކުލަވާލެވިފައިވަނީ ކޯޕަރޭޓިވް އެވިއޭޝަން ސެކިއުރިޓީ ޕްރޮގްރާމްގެ އެހީތެރިކަމާއިއެކު މިއަހަރު ކުރީކޮޅު ކަމަށް މިނިސްޓަރ ވިދާޅުވިއެވެ. އަދި ރާއްޖެއިން އަމާޒު ހިފާފައިވަނީ މި ޕްލޭންގައިވާ ކަންކަންކަމުގެ 90 އިންސައްތަ ހާސިލުކުރުންކަމަށްވެސް މިނިސްޓަރ ވަނީ ވިދާޅުވެފައެވެ.
މި ޕްރޮގްރާމުގައި އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން ކަނޑައަޅޭ އޭވިއޭޝަން ސެކިއުރިޓީ ސްޓޭންޑާޑްސްތައް އިމްޕްލިމެންޓު ކުރުމުގައި ގައުމުތަކަށް ފޯރުކޮށްދޭ ޓެކްނިކަލް އެހީ އާއި މެމްބަރު ގައުމުތަކުގެ މެދުގައި އޮންނަން ޖެހޭ ގާތްކަމާއި އެކުވެރި ކަމާއި އެއްބާރުލުން އުފައްދާ އެކަންތައްތައް ތަރައްގީ ކުރުމުގެ މައްޗައް މެމްބަރުން ވަނީ ވާހަކަ ދައްކަވާފައެވެ.
23 ގައުމަކުން މުޅިއެކު 65 ބޭފުޅުން ބައިވެރިވި މި ބައްދަލުވުމަކީ އޭވިއޭޝަން ސެކިއުރިޓީގެ ރޮނގުން ދިވެހިރާއްޖޭގައި ބޭއްވުނު ފުރަތަމަ ބައްދަލުވުން ކަމަށް ޑިފެންސް މިނިސްޓްރީން މައުލޫމާތު ދެއްވިއެވެ.
.
