ކުރީގެ ރައީސް މައުމޫން އަބްދުލްގައްޔޫމުގެ ދިފާއީ ހެކިންގެ ގޮތުގައި ހުށަހެޅި ލިސްޓް ބަލައިނުގަނެ އަނބުރާ ފޮނުވާލައިފި އެވެ.

ރައީސް މައުމޫންގެ މައްޗަށް ދައުލަތުން ކުރާ ޓެރަރިޒަމްގެ ދައުވާއާ ގުޅިގެން ދިފާއީ ހެކިންގެ ގޮތުގައި 100 އަށް ވުރެ ގިނަ މީހުންގެ ލިސްޓެއް ހުށަހަޅަފައިވެއެވެ.

ރައީސް މައުމޫންގެ ގާނޫނީ ޓީމުގައި އިސްކޮށް އުޅުއްވަމުން ގެންދަވާ މައުމޫން ހަމީދު ވިދާޅުވީ ދިފާއީ ހެކިންނާއި ލިޔުންތަކުގެ ލިސްޓް ކޯޓުން ބޭރުކޮށްލީ އެ ލިޔުންތައް ޕްރިންޓް ކުރިއިރު ބޯޑަރު ލައިންތައް ޕްރިންޓް ކުރެވިފައި ނެތުމުން ކަމަށް ބުނުމަށްފަހު ކަމަށެވެ.

ރައީސް މައުމޫންގެ މައްޗަށް ކުރާ ޓެރަރިޒަމުގެ ދައުވާއާ ގުޅިގެން ޝަރީއަތް ފެށުމުގެ ކުރިން ހުށަހަޅާ ހުށަހެޅުންތަކުގެ ގޮތުގައި ރައީސް މައުމޫންގެ ފަރާތްޕުޅުން މީގެ ކުރިން ވަނީ 29 ހުށަހެޅުމެއް ހުށަހަޅުއްވާފަ އެވެ. މި ހުށަހެޅުންތައް ކޯޓުން އަދި އަނބުރާ ފޮނުވާލާފައެއް ނުވެ އެވެ.

ރައީސް މައުމޫންގެ މައްޗަށް ވަނީ އަދުލު އިންސާފު ގާއިމުކުރުމަށް ހުރަސްއެޅުމުގެ ދައުވާ ވެސް އުފުލާފަ އެވެ.

ރައީސް މައުމޫންގެ މައްޗަށް އުފުލާފައިވާ ޓެރަރިޒަމުގެ ދައުވާ ސާބިތުވެއްޖެނަމަ އެމަނިކުފާނުގެ މައްޗަށް 17 އަހަރުގެ ޖަލު ހުކުމެއް އިއްވާނެ އެވެ.