ކުރިމިނަލް ކޯޓުގެ އިސްގާޒީގެ މަގާމަށް އެ ކޯޓުގެ ގާޒީ އަހުމަދު ހައިލަމް އައްޔަން ކުރައްވައިފި އެވެ. ހައިލަމް އަކީ އައްޑޫސިޓީގެ ބޭފުޅެކެވެ. އެ ކޯޓުގެ އިސް ގާޒީގެ މަގާމަށް ގާޒީ އަހުމަދު ހައިލަމް އައްޔަން ކުރަން ނިންމާފައިވަނީ ޖުޑީޝަލް ސާވިސް ކޮމިޝަން (ޖޭއެސްސީ) ގައި މިއަދު ބޭއްވި ޖަލްސާގައި ނެގި ސިއްރު ވޯޓަކުންނެވެ.
ގާޒީ ހައިލަމްއަކީ ސިޔާސީ ގިނަ ބޭފުޅުންތަކެއްގެ މައްސަލަ ބައްލަވާ ގާޒީއެކެވެ
ގާޒީ ހައިލަމް ކުރިމިނަލް ކޯޓަށް އައްޔަން ކުރެއްވީ ޖެނުއަރީ މަހުގެ ތެރޭގަ އެވެ. އޭގެފަހުން ބޮޑެތި މައްސަލަތައް އެ ގާޒީ ބައްލަވަ އެވެ. ކުރިމިނަލް ކޯޓުގެ އިސް ގާޒީގެ މަގާމު ހުސްވީ އެ މަގާމުގައި ހުންނެވީ އަބްދުލް ބާރީ ޔޫސުފް ކުއްލި ގޮތަކަށް ކުޑަކުދިންގެ ކޯޓަށް ބަދަލުކުރުމާ ގުޅިގެންނެވެ.
ގާޒީ ބާރީ ކުރިމިނަލް ކޯޓުން ބަދަލުކުރި ފަހުން ކޯޓުގެ ހިންގުމާ ހަވާލުވެ ހުންނެވީ ގާޒީ އާދަމް އާރިފެވެ. ކުރިމިނަލް ކޯޓުގެ އިސް ގާޒީއަކަށް އައްޔަންކުރުމަށް ގާޒީ އާރިފާއި ގާޒީ ހައިލަމްއާ އިންޓަވިއުކުރި ކަމަށް މައުލޫމާތު ލިބެ އެވެ.
ޑްރަގް ކޯޓާއި ޖުވެނައިލް ކޯޓުގެ އިސް ގާޒީގެ މަގާމަށް އައްޔަން ކުރާނެ ބޭފުޅުންވެސް ޖޭއެސްސީން މިއަދު ވަނީ ކަނޑައަޅާފައެވެ. ޑްރަގް ކޯޓުގެ އިސް ގާޒީ ކަމަށް އައްޔަން ކުރަން ނިންމީ އެ ކޯޓުގެ ގާޒީ އަބްދުއްސައްތާރު އަބްދުލް ހަމީދެވެ. ޖުވެނައިލް ކޯޓުގެ އިސް ގާޒީ ކަމަށް އެ ކޯޓުގެ ގާޒީ ސައީދު އިބްރާހިމް އައްޔަންކުރަން ވަނީ ނިންމާފައެވެ
