މުޅި ރާއްޖޭގައިމޫސުމީ ވިއުގައެއް ޤާއިމްކުރުމަށް، އޮޓޮމެޓިކް ވެދަރ ސްޓޭޝަން ހަރުކުރުމުގެ މަސައްކަތް ކުރަމުން ދާ ކަމަށް މޫސުމާބެހޭ ޤައުމީ އިދާރާއިން ބުނެފިއެވެ.
މި މަޝްރޫޢުގެ ދަށުން ފުރަތަމަ ވެދަރ ސްޓޭޝަން އިންސްޓޯލްކޮށްފައިވަނީ ކ.ދިއްފުށީގައެވެ.
މޫސުމާ ބެހޭ ގައުމީ އިދާރާއިން ހާމަކުރާ ގޮތުގައި ދެން އެންމެ އަވަހަށް އޮޓޮމެޓިކް ވެދަރ ސްޓޭޝަން ހަރުކުރުމަށް ހަމަޖެހިފައިވަނީ ކ.ގުރައިދޫއާއި ގާފަރުގައެވެ.
މުޅި ރާއްޖޭގައި މޫސުމީ ވިއުގައެއް ޤާއިމްކޮށް، މޫސުން ކުރިއަށް ލަފާކުރާނެ ގޮތް ދެނެގަންނާނެ ޑާޓާ އެއްކުރުމުގެ މަގްޞަދުގައި ކުރިއަށް ގެންދާ މި މަޝްރޫއަކީ އިޓަލީ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަޝްރޫއެކެވެ.
މި މަޝްރޫޢުގައި ރާއްޖޭގެ އެކި އަތޮޅުތަކުގައި 25 ވެދަރ ސްޓޭޝަން ހަރުކުރުމަށް ހަމަޖެހިފައިވެއެވެ. މަޝްރޫޢުގެ މަސައްކަތް ކުރިއަށް އޮތް ދެމަސް ދުވަހުގެ ތެރޭގައި ނިންމާލެވޭނެ ކަމަށް މޫސުމާބެހޭ ޤައުމީ އިދާރާއިން ބުނެއެވެ
މިހާރުވެސް އައްޑޫސިޓީއާއި ފުވައްމުލަކުގައި މިފަދަ ވެދަރ ސްޓޭޝަން ގާއިމުކޮށްފައިވާ ކަަމަށް އެ އިދާރާއިން ބުނެއެވެ.
