އެންމެ ފަހުން ސޯނަމް އަދި އަހޫޖާގެ ކައިވެނީގެ ރިސެޕްޝަނުން ފެނުމަށްފަހު ޝާހްރުކްޚާން މިވަނީ އޭނާގެ ކުރިޔަށް އޮތް ފިލްމް “ޒީރޯ”ގެ ޝޫޓިންގ އަލަބާމާގައި ފަށާފައެވެ.
ރިޕޯޓްތައް ބުނާގޮތުން މި ހަފްތާގެ ތެރޭގައި ހަންޓްސްވިލް ބޮޓޭނިކަލް ގާޑްން އަދި ހާވެސްޓްގެ ހިންދޫ ކަލްޗްރަލް ސެންޓަރ އޮފް އަލަބާމާގައި މި ފިލްމްގެ ޝޫޓީންގ މިވަނީ ފަށާފައެވެ. އެތަނުގައި މި ފިލްމްގެ އަންހެން ލީޑްރޯލުން ފެނިގެންދާ އަނުޝްކާ ޝަރްމާ އަދި ކެޓްރީނާ ވެސް މިވަނީ ޝާހްރުކްޚާނާއިއެކު ޝޫޓިންގ ގައި ބައިވެރިވެފައެވެ.
ހަށިގަނޑު ބޮޑުނުވާ އިސްކޮޅުން ކުރު (ޑްވާފް)މީހެއްގެ ރޯލުން ޝާހްރުކްޚާން ފެނިގެންދާ މި ފިލްމަކީ މިއަހަރު ގިނަ ބަޔަކު އިންތިޒާރު ކުރަމުންދާ އެއް ފިލްމެވެ. ޚާއްސަ މަންޒަރަކުން ސަލްމާން ޚާން ވެސް މި ފިލްމުން ފެނިގެންދާނެއެވެ. އަދި މީގެ އިތުރުން މަރުހޫމާ ޝްރީދޭވީ ، ކާޖޮލް، ރާނީ މުކަރްޖީ، ކަރިޝްމާ ކަޕޫރު އަދި އާލިޔާ ބަޓް ވެސް ފެނިގެންދާނެއެވެ.
އާނަންދް އެލް. ރާއީ ޑައިރެކްޓް ކުރާ މި ފިލްމް ރިލީޒް ކުރެވޭނެ ކަމަށް ވަނީ 21 ޑިސެމްބަރު 2018 ގައެވެ.
