ރައީސް މައުމޫން ޖަލު ބަންދުން ގޭ ބަންދަށް ބަދަލުކޮށްދެއްވަން ކެރިވަޑައިނުގަންނަވާނަމަ ރައީސް މައުމޫން އަރިހުގައި ޖަލުގައި ބަންދުކޮށްދެއްވުމަށް އެމަނިކުފާނުގެ އަނބިކަނބަލުން ނަސްރީނާ އިބްރާހިމް ފުލުހުންގެ ކިބައިން އެދިވަޑައިގެންފިއެވެ.
އެކަމަނާ މިކަމަށް އެދިވަޑައިގެންނެވީ ފުލުހުންގެ އިދާރާ ހިންގެވުމާއި ވަގުތީ ގޮތުން ހަވާލުވެވަޑައިގެން ހުންނެވި އަބުދުﷲ ނަވާޒަށް ފޮނުއްވެވި ސިޓީއެއްގައެވެ.
މި ސިޓީގައި ނަސްރީނާ ވިދާޅުވެފައި ވަނީ ރައީސް މައުމޫނަކީ ބިނައިން ޕެރޮކްސިމަލް ޕޮޒިޝަނަލް ވާރޓިގޯ (އަނބުރާ ގޮތްވުމުގެ) ބަލި ތަހަންމަލުކުރައްވަމުން ގެންދަވާ ބޭފުޅެއްކަމަށާ އެކަމުގެ ސަަބަބުން ވަރަށް ގިނަ އުދަނގޫތައް އެމަނިކުފާނަށް ކުރިމަތިވެވަޑައިގަންނަވަމުން ގެންދަވާކަމަށެވެ. ޚާއްސަކޮށް ގިނިކަންޏާ އެގޮތަށް ޖަލުގައި ހުންނެވުމަކީ ނުރައްކާތެރި ހާލަތެއް ކުރިމަތިވެދާނެކަމެއްކަމަށް އެކަމަނާ ވަނީ ވިދާޅުވެފައެވެ. އިއްޔެ ވެސް ރައީސް މައުމޫން އަނބުރައި ވަޑައިގެންފައިވާކަން ނަސްރީނާ ފާހަގަކުރައްވާފަ އިރު ގިނިކަންޏާއަށް ފާހާނާއަށް ވެސް ނުވަދެވޭކަން ވަނީ ފާހަގަކުރައްވާފަ އެވެ.
އެހެންކަމުން ރައީސް މައުމޫންގެ ސިއްހީ ހާލުކޮޅަށް ބެއްލެވުމަށްފަހު އެމަނިކުފާނު ޖަލު ބަންދުން ގޭ ބަންދަށް ބަދަލުކޮށްދެއްވުމަށް ނަސްރީނާ ވަނީ އެދިވަޑައިގެންފައެވެ. އަދި އެކަމަކީ ފުލުހުންނަށް ކުރެއްވޭނެ ކަމެއްކަމަށްވެސް ނަސްރީނާ ވިދާޅުވެފައިވެއެވެ. އެކަށް ކޮށްދެވެެން ނެތްނަމަ ރައީސް މައުމޫނަށް ކޮށްދެއްވަންޖެހޭ ކަންކަން ކޮށްދެއްވުމަށްޓަކައި އެމަނިކުފާނުގެ އަރިހުގައި ޖަލުގައި ބަންދުކޮށްދެއްވުމަށް ނަސްރީނާ ވަނީ ފުލުހުންގެ އިދާރާގައި އެދިވަޑައިގެންފައެވެ.
އެކަމަނާ ވަނީ ފިރިކަލުން ގެއަށް ބަދަލުކޮށްދެއްވުމަށް އެދިވަޑައިގެން ކްރިމިނަލް ކޯޓްގައިވެސް ތަކުރާރުކޮށް އެދިވަޑައިގެންފައެވެ. އަދިފުލުހުންނާއި ޕީޖީއަކީވެސް ރައީސް މައުމޫންގެ ހާލުކޮޅު ބެލެހެއްޓޭނެ އަދި ބަލަހައްޓާނޭ ބައެއްކަމަށްވެސް ގަބޫލުފުޅުނުކުރައްވާ ކަމަށް ނަސްރީނާ ވަނީ ވިދާޅުވެފައެވެ.
ރައީސް މައުމޫނުގެ ސިއްހީ ހާލުކޮޅު ސީރިއަސްވުމާއި ގުޅިގެން ރޭގެ ވަގުތެއްގައި ފުލުހުންގެ އެންގުމަކަށް ނަސްރީނާ ވަނީ ޖަލަށް ވަޑައިގެން ރައީސްގެ އަރިހުގައި ވަގުތުކޮޅެއް ހޭދަކުރައްވާފައެވެ.
ރައީސް މައުމޫންގެ އާއިލާ އިންނާއި ޤާނޫނީ ވަކީލުން ވަނީ އެމަނިކުފާނު ގޭބަންދަށް ބަދަލުކޮށްދިނުމަށް އެދިފައެވެ. ނަމަވެސް ކްރިމިނަލް ކޯޓުން ނިންމަވާފައި ވަނީ ރައީސް މައުމޫން ގޭބަންދަށް ބަދަލު ކުރެވެން ނެތް ކަމަށެވެ.
