ކުރީގެ ރައީސް މައުމޫން އަބްދުލް ގައްޔޫމުގެ ހާލުކޮޅު މިހާރު ކުރިއަށްވުރެ ރަނގަޅު ކަމަށް އެމަނިކުފާނުގެ ގާނޫނީ ވަކީލު މައުމޫން ހަމީދު ވިދާޅުވެއްޖެއެވެ.
ރައީސް މައުމޫންގެ އަރިހަށް މިއަދު ކުރެއްވި ޒިޔާރަތަށް ފަހު މައުމޫން ހަމީދު ކުރެއްވި ޓްވީޓެއްގައި ވިދާޅުވީ ރައީސް މައުމޫންގެ ހާލުކޮޅު މިހާރު ކުޑަކޮށް ރަނގަޅު ކަމަށާއި ނަމަވެސް އަދިވެސް އެމަނިކުފާނު ގިނިކަންޏާ ނުބެހެއްޓުމަށާއި ވެއްޓިވަޑައިގަތުމުގެ ފުރުސަތުބޮޑުކަމަށް ޑޮކްޓަރު ވިދާޅުވެފައިވާތީ އާލާއިން އަދިވެސް ދަނީ ރައީސް މައުމޫނު ގެއަށް ބަދަލުކުރުމުގެ މަސައްކަތް ކުރަމުން ކަމަށެވެ.
އާއިލާއިން ގެންދަނީ މިމަހުގެ ދެވަނަ ދުވަހުން ފެށިގެން ރައީސް މައުމޫންގެ ހާލުކޮޅު ގޯސް ކަމަށް ބުނެ އެމަނިުކުފާނު ގެއަށް ބަދަލު ކުރުމަށް ގޮވާލާ ގޮވާލުމުގެ އަޑު ހަރު ކުރަމުންނެވެ.
ރައީސް މައުމޫނުގެ އިލާއިން ބުނެފައިވާ ގޮތުގައި އެމަނިކުފާނަށް ކުރިމަތިވެވަޑައިގެންފައިވާ މައްސަލައަކީ ބެނިން ޕްރޮކްސިމަލް ޕޮޒިޝަނަލް ވާޓީގޯ(ބީޕީޕީވީ) ނަމަކަށް ކިޔާ ހާލަތެކެވެ.
އެ ހާލަތު މެދުވެރިވަނީ އުމުރުން ދުވަސްވުމުގެ ސަބަބުންނާއި ބޮލަށް ލިބޭ ގެއްލުމެއްގެ ސަބަބުންނެވެ. ބީޕީޕީވީއަކީ ކަންފަތުގެ އެތެރެއަށް ދިމާވާ މައްސަލައެއްގެ ސަބަބުން ކުރިމަތިވާ ހާލަތެކެވެ.
އެ ހާލަތު ކުރިމަތިވުމުން ބޮލަށް ގެންނަ ހަރަކާތެއްގެ ސަބަބުން ބެލެންސުން ނެއްޓި މީހާ ވެއްޓޭ ގޮތް މެދުވެރިވެދާނެއެވެ. އަދި އެ ހާލަތު ކުރިމަތިވާ މީހާއަށް އޭނާގެ ވަށައިގެން ހުންނަ އެއްޗެހި އެބުރޭހެން ހީވެދާނެއެވެ. އޭގެއިތުރުން ސްޓްރޯކް ޖެހުން ފަދަ ނުރައްކާތެރި ސިއްހީ މައްސަލަތައް ކުރިމަތިވެދާނެއެވެ.
