ފެނަކައިން އަތޮޅުތެރޭގައި ދެމުންގެންދާ ކަރަންޓް ހިދުމަތުގެ ފެންވަރު ރަނގަޅުކުރުމަށްޓަކައި ހިންގަމުން ގެންދާ ޚާއްސަ މަޝްރޫއުގެ ދަށުން ފަސޭހައިން ބިލު ދައްކާލެވޭ ސޮފްޓްވެއާއެއް އެ ކުންފުނިން ތައާރަފްކޮށްފިއެވެ
މިއަދު ޝީ ބިލްޑިންގްގެ ޖަލްސާކުރާ މާލަމުގައި ބޭއްވި ރަސްމިއްޔާތެއްގައި މި ސޮފްޓްވެއަރ އިފްތިތާހްކޮށްދެއްވީ ފެނަކަ ކޯޕަރޭޝަނުގެ ކުރީގެ މެނޭޖިންގ ޑިރެކްޓަރު އަހްމަދު ޝަރީފާއި ފެނަކަ ކޯޕަރޭޝަން ލިމިޓެޑުގެ ޑެޕިއުޓީ މެނޭޖިންގ ޑިރެކްޓަރު މުހައްމަދު ލަމްޢާން އެވެ
މި ސޮފްޓްވެއާ އާއި ބެހޭ ގޮތުން ވާހަކަ ދައްކަވަމުން އެކުންފުނީގެ ޑެޕިއުޓީ މެނޭޖިންގ ޑިރެކްޓަރު މުހައްމަދު ލަމްޢާން ވިދާޅުވީ މި ޤާއިމްކުރެވުނު ނިޒާމްގެ ސަބަބުން ހިސާބު ބެލެހެއްޓުމުގައި ވަރަށް ބޮޑު ލުއިފަސޭހައަކާއި ޔަޤީންކަމެއް ލިބިގެންދާނެކަމަށެވެ
މި ސޮފްޓްވެއާ އާއި އެޕްލިކޭޝަން އިން ކަސްޓަމަރުންނަށް ހާއްސަ ޕޯޓަލްއަކާއި، އޮންލައިންކޮށް ބިލުގެ ތަފްސީލު ބަލާލުމުގެ ފުރުސަތާއި އެކު ކަސްޓަމަރުންނަށް ބޭނުންވާ އެންމެހައި މައުލޫމާތާއި ފައިސާ ދެއްކޭނޭ ގޮތްވެސްު ވަނީ ހަމަޖެހިފައެވެ
ފެނަކައިގައި މިހާތަނަށް ބޭނުންކުރަމުން އައި ބިލިންގް ސޮފްޓްވެއާގެ ބަދަލުގައި ތައާރަފު ކުރި އާ ސޮފްޓްވެއާ ޑިވޮލަޕް ކޮށްފައިވަނީ ޝްވެކް މޯލްޑިވްސް ޕްރައިވެޓް ލިމިޓެޑް އިންނެވެ
