ރައްޔިތުންގެ މަޖްލީހުގައި ހިނގަމުން އައި ޓްރާންފަރ މާކެޓް ނިމުމަކަށް އައިއްސި ކަމަށް ޕީޕީއެމްގެ ޕާލިމަންޓްރީ ގްރޫޕްގެ ލީޑަރ އަދި ވިލިމާލޭ ދާއިރާގެ މެމްބަރު އަހުމަދު ނިހާން ހުސެއިން މަނިކު ވިދާޅުވެއްޖެއެވެ.
ނިހާން މި ގޮތަށް ވިދާޅުވެފައިވަނީ އިންތިޚާބުވާ ޕާޓީން ވަކިކޮށްފިނަމަ ނުވަތަ ވަކިވެއްޖެ ނަމަ މެމްބަރު ކަމުގެ ގޮނޑި ގެއްލޭ ގޮތަށް މަޖިލީހުން ފާސްކުރި އެންޓި ޑިފެކްޝަން ގާނޫނު ބާތިލް ކަމަށް ކަނޑައެޅެން ނެތް ކަމަށް ސުޕްރީމް ކޯޓުގެ ތިން ފަނޑިޔާރުންގެ އިއްތިފާގުން ހުކުމް ކުރުމާއި ގުޅިގެން ކުރެއްވި ޓްވީޓެއްގައެވެ.
ޓްވީޓެއްގައި ނިހާނު ވިދާޅުވެފައިވަނީ ރާއްޖޭގެ ރައްޔިތުންގެ މަޖިލީހުގެ މެމްބަރުންގެ ޓްރާންސްފާ މާކެޓަށް ރަސްމީކޮށް މިއަދު ނިމުން އައިސްފައިވާ ކަމަށާއި ދެން މަޖިލީހަށް ކުރިމަތިލާ ބަޔަކު ކުރިމަތިލާނީ ޓްރާންސްފާ މާކެޓްގައި ނުވިކޭނެ ކަން އެނގި ތިބެކަމަށެވެ. އެހެންކަމުން ރައްޔިތުން ހޮވި ގޮތުގައި ދައުރު ނިމެންދެން ދެން މެމްބަރުން ތިބެންވާނެ ކަމަށްނިހާނު ވިދާޅުވިއެވެ .
މީގެ އިތުރުން ނިހާނު ވަނީ އެންޓި ޑިފެކްޝަން ބިލް ގާނޫނަކަށްވެ، ސުޕްރީމް ކޯޓުގެ ފަހު ބަހާއެކު ރައްޔިތުންނަށް އުފާވެރިކަން ލިބިފައިވާ ކަމަށް ވެސް ވިދާޅުވެފައެވެ.
އެންޓި ޑިފެކްޝަން ގާނޫނާ ގުޅޭ ގޮތުން ފަނޑިޔާރު ޑރ. އަބްދުﷲ ދީދީ އިއްވެވި ހުކުމުގައި ވަނީ ދުސްތޫރީ ނަޒަރަކުން ބަލާއިރު، އެންޓި ޑިފެކްޝަން ގާނޫނަކީ ރައްޔިތުންގެ މަޖިލީހުގެ މެމްބަރުން ފްލޯކްރޮސްކުރުމާ ބެހޭ ގޮތުންނާއި ބައި އިލެކްޝަން ބޭއްވުމުގެ ކަންކަމުގެ އިޖުރާއުތައް ހިމެނޭ ގާނޫނެއް ކަމަށެވެ.
ރައްޔިތުންގެ މަޖިލިހަށް އިންތިހާބުވި ސިޔާސީ ޕާޓީން ވަކިވުން، ވަކިކުރުން، އަދި އެހެން ޕާޓީއަކާ ގުޅިއްޖެ ނަމަ ގޮނޑި ގެއްލޭނެ ކަމަށް ކަނޑައަޅައި، މިދިޔަ އަހަރުގެ ޖުލައި 13 ގައި ނެރުނު ހުކުމްގައި ފާހަގަކުރި ގައިޑްލައިނާ އެއްގޮތަށް އެންޓި ޑިފެކްޝަން ގާނޫނުގައި އުސޫލުތައް ކަނޑައަޅާފައިވާ ކަމަށް ހުކުމުގައިވެ އެވެ.
އަދި ރައްޔިތުންގެ މަޖިލިހަށް އިންތިހާބުވި ސިޔާސީ ޕާޓީން ވަކިވުން، ވަކިކުރުން، އަދި އެހެން ޕާޓީއަކާ ގުޅިއްޖެ ނަމަ ގޮނޑި ގެއްލޭނެ ކަމަށް ކަނޑައަޅައި، މިދިޔަ އަހަރުގެ ޖުލައި 13 ގައި ނެރުނު ހުކުމްގައި ފާހަގަކުރި ގައިޑްލައިނާ އެއްގޮތަށް އެންޓި ޑިފެކްޝަން ގާނޫނުގައި އުސޫލުތައް ކަނޑައަޅާފައިވާ ކަމަށް ވެސް ހުކުމުގައިވެ އެވެ.
