މާރިޗު 2018ގައި ޖުމުލަ 217 މައްސަލައެއް ވަނީ މިނިސްޓްރީ އޮފް ޖެންޑަރ އެންޑް ފެމިލީއަށް ރިޕޯޓުކޮށް އެޓެންޑްކޮށްފައި ކަމަށް އެމިނިސްޓްރީ އިން އިއްޔެ އާންމު ކުރި ތަފާސް ހިސާބުތަކުގައި ދައްކައިފިއެވެ
މާޗް މަހުގެ ނިޔަލަށް ހުށަހެޅުނު މައްސަލަތަކުގެ ތެރެއިން 58 އިންސައްތަ މައްސަލައަކީ ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތައް ކަމަށް ވާއިރު، ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 125 މައްސަލައެއް ވަނީ ރިޕޯޓްކޮށްފައި ކަމަށް އެ މިނިސްޓްރީއިންބުނެފައިވެއެވެ. މީގެ ތެރެއިން އެންމެ ގިނައީ ޖސްމާނީ ހާނީއްކައިގެ މައްސަލަތަކާއި އިހުމާލުގެ މައްސަލަތައްކަމަށް ވެސް މިނިސްޓްރީއިން ބުނެފައި ވެއެވެ
މި ގޮތުން ޖިސްމާނީ ހާނީއްކައިގެ 27 މައްސަލައެއް އަދި އިހުމާލުވުމުގެ 27 މައްސަލައެއް ރިޕޯޓުކޮށްފައިވެއެވެ
މި ބާވަތުގެ މައްސަލަތަކުގެ އިތުރުން ޖިންސީ ހާނީއްކައިގެ 23 މައްސަލަ، ނަފްސާނީ ހާނީއްކައިގެ 22 މައްސަލަ، އެހެން ކުދިންގެ ފަރާތުން ގަނާލިބުމުގެ އަދި ފުރައްސާރައިގެ ޝިކާރައަކަށްވުމުގެ 15 މައްސަލަ، ގެވެށި އަނިޔާ ކުރާތަން ދެއްކުން ނުވަތަ ފެނުމުގެ 7 މައްސަލަ، ކުދިން ދޫކޮށްލައިފައި ދިޔުމުގެ 3 މައްސަލަ، އަދި އެހެން ކުދިންގެ ފަރާތުން އިންޓަރނެޓް މެދުވެރިކޮށް ގަނާލިބުމުގެ ނުވަތަ ސައިބަރ ބުލީންގގެ ޝިކާރައަކަށްވުމުގެ 1 މައްސަލަ ހިމެނެއެވެ
ހައްގުތަކުން ކުޑަކުދިން މަހްރޫމުކުރުމުގެ މައްސަލަތައްވެސް މިމުއްދަތުގެ ތެރޭގައި ހުށަހަޅާފައިވާއިރު މީގެތެރޭގައި ތައުލީމަށް ހުރަސް އެޅުމާއި، އުފަންވުމުން ރަޖިސްޓްރީ ނުކުރުމާ ބެހޭ މައްސަލަތަކާއި، ސިއްހީ ފަރުވާއަށް ހުރަސްއެޅުމުގެ މައްސަލަތައް ވެސް ޖެންޑަ މިނިސްޓްރީއަށް ވަނީ ހުށަހަޅާފަ އެވެ. އަދި އާއިލީ މައްސަލަތަކާއި، ކުޑަކުދިން ވައްކަން ކުރުމާއި، އަހްލާގީ މައްސަލަތަކާއި، ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ މައްސަލަތައްވެސް ހުށަހެޅިފައިވާ ކަމަށް މިނިސްޓްރީގެ ތަފާސްހިސާބުތަކުގައި ހިމަނާފައިވެ އެވެ. މިގޮތުން ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 31 މައްސަލަ މިދިޔަ މަހު މިނިސްޓްރީއަށް ވަނީ ހުށަހަޅައިފައެވެ. މިއީ މާރިޗު 2018ގައި ރިޕޯޓުކޮށްފައިވާ މައްސަލަތަކުގެ ޖުމުލަ 14 އިންސައްތައެވެ
ޖެންޑަ މިނިސްޓްރީގެ ތަފާސްހިސާބު ދައްކާ ގޮތުން ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ނުދިނުމުގެ މައްސަލަތައްވެސް ވަނީ ހުށަހަޅާފަ އެވެ. އެގޮތުން އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހަޅައިފައިވާ ތިން މައްސަލައަކާއި، ނުކުޅެދުންތެރިކަން ހުންނަ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހަޅާފައިވާ ދެ މައްސަލައެއްްވެސް މީގެތެރޭގައި ހިމެނެ އެވެ
މީގެ އިތުރަށް އަމިއްލަ ނަފްސަށް ގެއްލުން ދިނުުގެ ފަސް މައްސަލަވެސް ހުސްވި މާޗު މަހު މިނިސްޓްރީއަށް ރިޕޯޓުކޮށް އެޓެންޑް ކޮށްފައިވެއެވެ
