މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ރާއްޖެއިން ބޭރު ގައުމެއްގައި ވޯޓު ފޮށި ބަހައްޓާނީ އެގައުމަކުން 200 އަށްވުރެ ގިނަ މީހުން ވޯޓުލާން ރަޖިސްޓްރީ ކޮށްފި ނަމަ ކަމަށް އިލެކްޝަންސް ކޮމިޝަނުން ބުނެފިއެވެ.
ވޯޓު ފޮށި ބަހައްޓާ ތަންތަނުގެ އުސޫލު ފާސްކޮށްފައިވަނީ އިލެކްޝަންސް ކޮމިޝަންގެ 403 ވަނަ އާންމު ޖަލްސާއިން ފާސްކޮށްފައެވެ. އެޖަލްސާގައި ވާހަކަ ދައްކަވަމުން އިލެކްޝަންސް ކޮމިޝަނުގެ ތަރުޖަމާނު އަޙްމަދު އަކްރަމް ވިދާޅުވީ ރާއްޖެއިން ބޭރު ގައުމެއްގައި ވޯޓު ފޮށި ބަހައްޓާނީ އެގައުމަކުން 200 އަށްވުރެ ގިނަ މީހުން ވޯޓުލާން ރަޖިސްޓްރީ ކޮށްފައިވާނަމަ އަދި ސިނާއީ މަސައްކަތް ކުރާ ރަށްރަށާއި ރިސޯޓުތަކުގައި ވޯޓު ފޮށި ބަހައްޓާނީ ވޯޓުލާން މަދުވެގެން 100 މީހުން ރެޖިސްޓްރީ ކޮށްފި ނަމަކަމަށެވެ.
މިއަހަރުގެ އިންތިހާބަށް ކުރިމަތި ލުމުގެ ފުރުސަތު ފެށޭ މަހު ހުޅުވާލާނެ ކަމަށްވެސް އިލެކްޝަންސް ކޮމިޝަނުން ވަނީ ބުނެފަ އެވެ.
މިއަހަރުގެ ރިޔާސީ އިންތިހާބުގައިރައީސް އަބްދުﷲ ޔާމީން ވާދަކުރާނެކަން ޔަގީންވެފައިވާ އިރު އިދިކޮޅު ޕާޓީތަކުން އަދި ކެންޑިޑޭޓަކު ކުރިމަތިލާނެކަމުގެ އިޝާރާތެއް ކޮށްފައެއް ނުވެއެވެ.
