މޫސުމް ގޯސްވުމުގެ ސަބަބުން ރާއްޖޭގެ ދެކުނުގެ މަސްވެރިކަން ދަށަށްގޮސްފައިވާކަމަށް މަސްވެރިން ބުނެފިއެވެ. ލަފާކުރެވޭގޮތުގައި މަސްވެރިކަން ދަށްވެފައިވަނީ މޫސުން ގޯސް ވުމުގެ ސަބަބުން ކަނޑުގެ އޮއިވަރަށް އައި ބަދަލުގެ ސަބަބުންނެވެ.
މި ދިޔަ ހަފްތާގައި ދެކުނުގެ އަތޮޅު ތަކަށް މަސްވެރިކަން ރަނގަޅުވެ ދެކުނުގެ ބައެއް ދޯނިފަހަރު 10 ޓަނަށްވުރެ ގިނައިން މަސްބާނައިފައި ވާއިރު، ބައެއް ދީނިފަހަރު 40 ޓަނު މަސްވެސް ބާނައިފައި ވާކަމަށް މަސްވެރިން މައުލޫމާތުދެއެވެ. އެންމެ ގިނައިން މަސްބޭނި ސަރަހައްދުގެ ގޮތުގައި މަސްވެރިން ބުނީ ގދ ފިޔޯރީއާ ދިމާ 50 މޭލު ބޭރުންނެވެ. އެސަރަހައްދުން ބާނާފައިވަނީ ރަސް އައިންތަކުން ގޮދާކަމަށް މަސްވެރިން ބުނެއެވެ.
މީގެސަބަބުން މަސްކިރުމަށް ލަސްތަކެއް ކުރިމަތިވެ މަސް ގަތުމުގައި ދަތިތަކެއް ދިމާވިކަމަށް މިފްކޯއިން ބުނެއެވެ. ނަމަވެސް ކިޔޫގައި ތިބި ދޯނިފަހަރަށް ހިލޭ އައިސް ފޯރުކޮށްދީގެން ހުރިހާ ދޯނިފަހަރުގެ މަސް ކިރާފައިވާކަމަށް އެކުންފުނިން ވަނީ ބުނެފައެވެ.
މަސްވެރިކަން ދައްވެފައި އޮތުމަށްފަހު ކުއްލިއަކަށް މަސްވެރިކަން އާދަޔާ ޚިލާފަށް ރަނގަޅުވުމުން މަސްކިރުމާއި، އަދި މަސްވެރިންނަށް ބޭނުންވާވަރަށް އައިސް ފޯރުކޮށްދިނުމުގައި، ބައެއް ކަހަލަ ދަތިތަކާ މިފްކޯއިން ވެސް ކުރިމަތިލާން ޖެހުނުކަމަށް އެކުންފުނިން ވަނީ ބުނެފައެވެ.
ފާއިތުވި ހަ މަސްދުވަހަށް ބަލާއިރު އެވްރެޖްކޮށް ދުވާލަކަށް އެކުންފުންޏަށް ލިބިފައިވަނީ 150 ޓަނު މަސް ނަމަވެސް މި ހަފްތާގެ ކުރީކޮޅު ދުވާލަކު 600 ޓަނާއި 700 ޓަނާ ދެމެދުގެ އަދަދަކަށް މަސްގަނެފައިވާކަމަށް މިފްކޯއިން ބުނެއެވެ.
މިފްކޯއިން ވަނީ ދެކުނުގައި މަސްވެރިކަން ރަނގަޅުވުމުން އެސަރަހައްދުގައި މަސް ގަތުމުގެ ކެޕޭސިޓީ މިފްކޯއިން އިތުރުކޮށްފައެވެ. މިގޮތުން ރާއްޖޭގެ އިތުރުގައި ހަރަކާތްތެރިވި އެކުންފުނީގެ މަސްގަންނަ އެންމެ ބޮޑު ބޯޓު ދެކުނަށް ގެންގޮސް މަސްގަނެފައިވެއެވެ.
