ސްޕެއިން އަދި ދުނިޔޭގައި ވެސް ފުޓްބޯޅައިގާ ރަސްކަން ކުރަމުންގެންދާ ވަރުގަދަ ބާސެލޯނާ ސިއްސުވާލާ އިޓަލީގެ ރޯމާއިން ޔޫއެފާ ޗެމްޕިއަންސް ލީގުގެ ސެމީފައިނަލަށް ދަތުރުކޮށްފިއެވެ.
ސްޕެނިޝް ލީގުގައި ބަލިނުވާތާ އަހަރެއް ވެފައިވާ ޔޫރަޕުގެ ގަދަބާރު ބާސެލޯނާ އަތުން ރޮމާ މޮޅުވެފައިވަނީ 3-0 ލަނޑުގެ ނަތީޖާއަކުންނެވެ.
މިދެ ޓީމް ޗެމްޕިއަންސް ލީގުގެ ކުއާޓާގެ ފުރަތަމަ ލެގުގެ މެޗު ބާސާއިން އަމިއްލަ ދަނޑުގައި 4-1 ލަނޑުން މެޗު ކާމިޔާބު ކުރި ނަމަވެސް ރޯމާއިން ސެމީއަށް ދިޔައީ ދެމެޗުގެ ނަތީޖާ 4-4 ލަނޑުން އެއްވަރުވެ އަވޭ ގޯލުންނެވެ.
ރޯމާއިން ރޭ އަމިއްލަ ދަނޑުގައި ކުޅުނު މެޗުގައި މޮޅު ކުޅުމެއް ދައްކާފައިވާއިރު މިމެޗުގައި ރޯމާއިން ކާމޔާބުކުރި ފުރަތަމަ ލަނޑު މެޗުގެ 6 ވަނަ މިނެޓުގައި ކާމިޔާބުކުރީ އެޑިން ޗެކޯއެވެ.
މިނަތީޖާއާއި އެކު ފުރަތަމަ ހާފް 1-0 ލަނޑު ކުރީގައި އޮވެ ރޯމާއިން ފުރަތަމަ ހާފް ނިންމާލި ނަމަވެސް ދެވަނަ ހާފު ފަށައިގެން 58 ވަނަ މިނެޓުގައި ލިބުނު ޕެނަލްޓީއަކުން ޑެނިއެލް ޑި ރޮސީ ވަނީ ރޯމާއަށް މެޗުގެ ލީޑު ފުޅާކޮށް ދީފައެވެ.ރޭގެ މެޗުގައި ރޯމާ ސެމީގެ ޖާގައެއް ކަށަވަރު ކުރި ލަނޑު ކާމިޔާބުކޮށްދީފައިވަނީ މެޗު ނިމެން މިނެޓުކޮޅަކަށް ވެފައިވަނިކޮށް ފުރަތަމަ ލެގުގައި ބައިކޮޅަށް ގޯލް ޖެހި މޮނަލަސް އެވެ.
މި ނަތީޖާއާ އެކު ރޯމާ ވެފައިވަނީ ޗެމްޕިއަންސް ލީގުގެ ފުރަތަމަ ލެގުގައި ތިން ލަނޑުގެ ލީޑެއް އޮތްވައދެ ވަނަ ލެގުގައި އަނބުރާލި ތިން ވަނަ ޓީމަށެވެ. އެކަން މީގެ ކުރިން ކުރީ 2004 ވަނަ އަހަރު އޭސީ މިލާނުގެ މައްޗަށް ކުރި ހޯދި ސްޕެއިނުގެ ޑިޕޯޓިވޯ ލަކޮރޫނާ އަދި މިދިޔަ ސީޒަނުގައި ޕީއެސްޖީގެ މައްޗަށް ކުރި ހޯދި ބާސެލޯނާ އެވެ.
