އައްޑޫ އިންޓަރސްކޫލް ނެޓްބޯޅަ މުބާރާތް 2018ގެ ގުރުއަތުލުން މިއަދު ބާއްވައިފިއެވެ.
މި އަހަރު މި މުބާރާތް އިންތިޒާމް ކުރާ ސްކޫލް ކަމަށްވާ އައްޑޫ ސިޓީ ހިތަދޫ ޝަރަފުއްދީން ސްކޫލްގެ ސެމިނަރ ރޫމްގައި މިއަދު ހެނދުނު ބޭއްވުނު ގުރުއަތު ނެގުމުގައި ދެ ސްކޫލެއް ފިޔަވާ އެހެން ހުރިހާ ސްކޫލެއްގެ ޓީމް މެނޭޖަރުން ވަނީ ބައިވެރިވެފައެވެ. ޓީމް މެނޭޖަރުންނަށް ބައިވެރި ނުވެވުނު ދެ ސްކޫލް ކަމަށްވާ ފުވައްމުލައް ސިޓީގެ ހާފިޒް އަޙުމަދު ސްކޫލް އަދި އެމް.ޖޭ.އެސް ގެ ފަރާތުން ވެސް ބަދަލުގައި ގުރުއަތު ނަގާނެ ބޭފުޅަކު ވަނީ ފޮނުއްވާފައިވެއެވެ.
މިއީ މިފަދަ މުބާރާތެއް އައްޑޫ ސިޓީގެ ސްކޫލްތަކަށް އަމާޒު ކޮށްގެން ބޭއްވޭ 3 ވަނަ ފަހަރެވެ. ފާއިތުވެ ދިޔަ ދެ އަހަރު މި މުބާރާތް އިންތިޒާމްކޮށް ބާއްވާފައިވަނީ ހިތަދޫ ސްކޫލްގައެވެ. މި މުބާރާތުގައި އައްޑޫ ސިޓީއިން ބޭރު ރަށަކުން ބައިވެރިވާ މިއީ ފުރަތަމަ ފަހަރެވެ. އައްޑޫ ސިޓީގެ ހުރިހާ ސްކޫލެއްގެ އިތުރުން ފުވައްމުލައް ސިޓީގެ 2 ސްކޫލަކުން ވަނީ މި މުބާރާތުގައި ބައިވެރިވެފައެވެ. 5 އުމުރު ފުރާ އަކުން މި މުބާރާތުގައި ޓީމްތައް ވާދަ ކުރާނެއެވެ. އެއީ 9 އަހަރުންދަށާއި، 11 އަހަރުން ދަށް، 13 އަހަރުން ދަށް، 15 އަހަރުން ދަށް އަދި 17 އަހަރުން ދަށުގެ އުމުރު ފުރާއެވެ.
ދެ ސިޓީގެ 15 ސްކޫލަކުން 43 ޓީމް މި މުބާރާތުގައި ވާދަ ކުރާނެއެވެ. ޖުމްލަ 645 ކުދިން ބައިވެރިވާ މި މުބާރާތުގެ ޓީމް އޮފިޝަލުންގެ ގޮތުގައި 129 ބޭފުޅުން ޙަރަކާތްތެރިވާނެ ކަމަށް ޝަރަފުއްދީން ސްކޫލްގެ ޕްރިންސިޕަލް ޑރ.އަޙުމަދު އަދީލް ނަސީރު ވިދާޅުވިއެވެ.
މި މުބާރާތުގައި ޖުމްލަ 60 މެޗް ކުޅޭވޭނެއެވެ. 8 ދުވަހަށް ބަހާލައިގެން ކުރިޔަށް ގެންދިޔުމަށް ހަމަޖެހިފައިވާ މި މުބާރާތް ބޭއްވުމަށް ހަމަޖެހިފައިވަނީ މި ހިނގާ އޭޕްރީލް މަހުގެ 20 ވަނަ ދުވަހުން ފެށިގެން 27 ވަނަ ދުވަހާއި ހަމަޔަށެވެ.
