ވިލިމާލޭ ދައިރާގެ މެންބަރު އަހުމަދު ނިހާން ހުސެއިން މަނިކުގެ ދޮށީ ދަރިކަލުން، މުހައްމަދު އަލާން އަހުމަދުގެ ނަމުގައި 4.7 މިލިއަން ރުފިޔާގެ ޕްލެޓިނަމް ފްލެޓެއް ބައްލަވާގެންފައިވާ ކަން ހާމަވެއްޖެ އެވެ
ޕީޕީއެމްގެ ޕީޖީ ގްރޫޕް ލީޑަރު ނިހާން ހުސެއިން މަނިކުގެ ދަރިފުޅުން، އަލާން ގެ ނަމުގައި ޕްލެޓިނަލް ފްލެޓެއް ބައްލަވާގެންފައިވާ ކަން ހާމަވީ ސިވިލް ކޯޓުގައި އެކަން ތާވަލުކޮށްފައި އޮތުމުންނެވެ.ނިހާންގެ ދަރިފުޅުގެ ނަމުގައި ގަނެފައިވާ ފްލެޓާއި ގުޅިގެން ސޯޝަލް މީޑިއާގައި ގިނަ ބަޔަކު ފާޑުކިޔަމުންދާއިރު ނިހާން ވިދާޅުވީ ބޯހިޔާވެހިކަން ހޯދުމުގެ ގޮތުން ރާއްޖޭގެ ދެ ބޭންކަކުން ނިހާން ހިމެނޭ ގޮތަށް 5.2 މިލިއަން ރުފިޔާގެ ލޯނެއް ނަގާފައިވާނެކަމަށެވެ
މީގެ އިތުރުން ނިހާން ވިދާޅުވީ އޭނާ ރައްޔިތުން މަޖިލީހުގެ މެންބަރެއްގެ ގޮތުގައި ހުންނަވަތާ މިހާރު ނުވަ އަހަރުވެފައިވާ ކަމަށާއި ކޮންމެ މަހަކު މަދުވެގެން 79،000 ރުފިޔާ އާންމްދަނީގެ ގޮތުގައި ލިބޭ ކަމަށެވެ. އެހެންކަމުން މިއަދާ ހަމަޔަށް މުސާރައިގެ ގޮތުގައި އޭނާއަށް 8.5 މިލިއަން ރުފިޔާ ލިބިފައިވާނެ ކަމަށް ނިހާންވަނީ ވިދާޅުވެފައެވެ. ނިހާން ވަނީ މިކަމާއި ގުޅިގެން ދައްކާނެ މާގިނަ ވާހަކައެއް ނެތްކަމަށާއި ޝައްކުވާ ކަމެއް އުޅެންޏާ އެ ޝައްކުވާ ކަމެއް ހިފައިގެން ރާއްޖޭގައި ކަމާ ބެހޭ މިނިވަން މުއައްސަސާތަކަށް ވަޑައިގަންނަވާ، އެކަންތައް އިތުރަށް އޮޅުން ފިލުވުމަށް އެދިވަޑައިގެންފައެވެ
