ވުމެންސް ޑިވެލޮޕްމެންޓް ކޮމިޓީ (ޑަބްލިޔުޑީސީ) އާއި އައްޑޫ ސިޓީ ކައުންސިލް ގުޅިގެން ކުރިއަށް ގެންދިޔަ ތުއްތު ކުދިންނަށް ހެދުން ފަހަން ދަސްކޮށްދޭ ކޯސް ރޭ ނިންމާލައިފިއެވެ.
އައްޑޫ ސިޓީގެ ކޮންމެ އަވަށަކުން ފަސް ބައިވެރިންނަށް ފުރުސަތުދީގެން ބޭއްވި މިކޯސް ފުރިހަމަކޮށް 30 ބައިވެރިން ވަނީ ސެޓްފިކެޓް ހާސިލްކޮށްފައެވެ.
މާޗް މަހުގެ 24-29 ވަނަ ދުވަހުގެ ނިޔަލަށް ބޭވި މިކޯހުގެ މަރަދޫ،މަރަދޫ ފޭދޫ އަދި ފޭދޫ ދާއިރާގެ ބައިވެރިންގެ ކުލާސްތައް މަރަދޫ އަވަށު އޮފީހުގައި ކުރިއަށް ގެންގޮސްފައިވާއިރު ހިތަދޫގެ ކުލާސްތައް ކުރިއަށް ގެންގޮސްފައިވަނީ ކައުންސިލް އިދާރާގައެވެ.
ރޭ ކުރިއަށް ގެންދިޔަ މިކޯސް ނިންމުގެ ރަސްމިއްޔާތް ޝަރަފުވެރިކޮށް ބައިވެރިންނަށް ސެޓްފިކެޓް ހަވާލުކޮށް ދެއްވާ ފައިވަނީ ޖަލްސާގެ ޝަރަފްވެރި މެހެމާން އިކުއޭޓާވިލޭޖްގެ މެނޭޖަރ ވަހީދެއެވެ.
މިރޭގެ ރަސްމީޔާތުގައި ވާހަކަ ދައްކަވަމުން ޑަބްލިޔުޑީސީގެ ރައީސާ ޝެހެނާޒް ރަޝީދު ބުނީ މިކޯހުގެ މަގްސަދަކީ އަންހެނުން ބާރު ވެރި ކޮށް ރަށުގައި ތިބެގެން އާމްދަނީ ހޯދޭނެ ފުރުސަތު ތަނަވަސް ކޮށްދިނުން ކަމަށެވެ.
ޝެހެނާޒް ބުނީ މިހާރު ކޯހުގައި ބައިވެރިންނަށް އަމިއްލައަށް ކުޑަކުދިންގެ ހެދުމާއި ބޫޓާއި ސްޓާކީން ފަދަ ތަކެތި ބޭނުން ފެންވަރެއްގައި ހަދާލެވޭނެ ކަމަށާއި އެހެން ކަމުން އުންމީދަކީ މިބައިވެރިންގެ އުފެއްދުން ތައް މުޅި ރާއްޖޭއިން ވެސް ލިބެން ހުރުން ކަމަށެވެ.
