ޕަދްމާވަތްގައި އަލާއުއްދީން ކިލްޖީގެ ރޯލުން ފެނިގެން ދިޔަ ރަންވީރު ސިންގް އެ ފިލްމުގައި ދައްކާފައިވާ މޮޅު ހުނަރުގެ ސަބަބުން އޭނާގެ ތަރި ވަނީ މެދު އުޑުގައި ފިޔަޖަހާފައެވެ.އެ ފިލްމުގައި ނުބައި ބައި މީހެއްގެ ރޯލުން ފެނިގެން ދިޔަ ރަންވީރުގެ މަގްބޫލުކަން އިތުރުވެފައިވާއިރު އޭނާއަށް ލިބެމުންދާ ފުރުސަތުތައްވެސް ދަނީ އިތުރުވަމުންނެވެ
މި ގޮތުން އަންނަ އެޕްރީލް މަހުގެ 7 ވަނަ ދުވަހު ފެށުމަށް ހަމަޖެހިފައިވާ އިންޑިއަން ޕްރިމިއަރ ލީގުގައި ރަންވީރުގެ ހަރަކާތެއް ކުރިއަށް ގެންދިއުމަށް ހުށަހަޅާފައިވާ އަގުމިވަނީ ރިކޯޑް އަދަދެއްގައެވެ. މީޑިއާ ރިޕޯޓްތައް ބުނާ ގޮތުން 15 މިނިޓްގެ މި ހަރަކާތަށް 5 ކްރޯޑް ރުފިޔާ ހުށަހަޅާފައިވާއިރު، މިހާ ބޮޑު އަދަދެއް މުބާރާތް އިންތިޒާމްކުރާ ޓީމުން ހުށަހަޅާފައިވާ ސަބަބަކީ ކޮންމެ ހަލާތެއްގައިވެސް މި ހަރަކާތުގައި ރަންވީރު ބައިވެރިވާން އެ ޓީމުން ބޭނުންވާތީއެވެ
މިހާރުވެސް ގިނަ ފިލްމުތަކެއްގެ މަސައްކަތް ކުރަމުންދާ ރަންވީރު މިހާރު އުއްމީދު ކުރަމުން ދަނީ 14 ފެބްރުއަރީ 2019 ގައި ސިނަމާތަކުގައި އެޅުވުމަށް ނިންމާފައިވާ ގުލީ ބޯއި އަށެވެ. މި ފިލްމާ ބެހޭ ގޮތުން ރަންވީރު ބުނެފައިވަނީ އޭނާގެ ފުރަތަމަ ފިލްމު ބޭންޑް ބަޖާ ބާރާތްއަށް ފަހު ދެން އޭނާއަށް އެންމެ ހާއްސަ ފިލްމަކީ ގުލީ ބޯއި ކަމުގައެވެ
