ޖުމްހޫރީ ޕާޓީގެ ޑެޕިއުޓީ ލީޑަރު އަދި ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒްގެ މައްޗަށް ދައުލަތުން އުފުލާފައިވާ ރަސްމީ ހައިސިއްޔަތުން ކުރަންޖެހޭ ކަމަކަށް ނުފޫޒު ފޯރުވުމުގެ ދައުވާއާއި ގުޅިގެން ޝަރީއަތުގެ އަޑުއެހުމެއް މިއަދު ބޭއްވުމަށް ތާވަލްކޮށްފި އެވެ.
ކްރިމިނަލް ކޯޓުގައި މިމައްސަލައިގެ ޝަރީއަތުގެ އަޑުއެހުމެއް ބާއްވަން ނިންމާފައިވަނީ މިއަދު މެންދުރުފަހު 1:30 ގައެވެ.
މިމައްސަލައިގެ ޝަރީއަތް ފެށުމުގެ ގޮތުން މިމަހުގެ 11 ވަނަ ދުވަހާއި މިމަހުގެ 18 ވަނަ ދުވަހު ވެސް ކްރިމިނަލް ކޯޓުގައި ވަނީ އަޑުއެހުމެއް ތާވަލްކޮށްފަ އެވެ. މިމަހުގެ 11 ވަނަ ދުވަހު ބޭއްވި އަޑުއެހުމުގައި މައްސަލަ ކުރިއަށް ގެންދަން ބޭނުންވަނީ ވަކީލަކާ އެކު ކަމަށް ރިޔާޒު ވިދާޅުވުމުން އެ ދުވަހުގެ ޝަރީއަތް ނިންމާލީ ވަކީލަކު ހަމަޖައްސަން ރިޔާޒަށް ފަސް ދުވަހުގެ ފުރުސަތެއް ދިނުމަށްފަހު އެވެ. ނަމަވެސް އޭނާ ބަންދުގައި ހުރުމާ ގުޅިގެން މިމައްސަލާގައި މިމަހުގެ 18 ވަނަ ދުވަހު ބޭއްވި އަޑުއެހުމަށް ރިޔާޒު ހާޒިރުކުރި އިރުވެސް ވަކީލަކު ހަމަޖެހިފައި ނުވާތީ އެ ދުވަހު ބޭއްވި ފުރަތަމަ އަޑުއެހުން ނިންމާލީ ވަކީލަކު ހަމަޖައްސަން ފަސް ދުވަހުގެ ފުރުސަތެއް ދިނުމަށްފަހު އެވެ.
ރިޔާޒު މިއަދު ކޯޓަށް ހާޒިރުކުރާއިރު އޭނާ ހުންނެވީ ކުއްލި ނުރައްކަލުގެ ހާލަތުގެ ދަށުން މިމަހުގެ ދެވަނަ ދުވަހުން ފެށިގެން ހައްޔަރުކޮށްފަ އެވެ. އަދި ސަރުކާރު ވައްޓާލަން މަސައްކަތް ކުރެއްވި ކަމުގެ ތުހުމަތު ފުލުހުން ވަނީ ރިޔާޒުގެ މައްޗަށް ކޮށްފަ އެވެ. އެކަމަކު އޭނާ ހައްޔަރުކުރުމަށްފަހު ދައުވާކޮށްފައިވަނީ ޓެރަރިޒަމުގެ ކުށުގަ އެވެ.
ރިޔާޒުގެ މައްޗަށް ރަސްމީ ހައިސިއްޔަތުން ކުރަންޖެހޭ ކަމަކަށް ނުފޫޒު ފޯރުވުމުގެ ދައުވާ އުފުލަނީ ކޮން މައްސަލައެއްގައި ކަން އަދި ވަނީ ސާފުވާ ގޮތް ނުވެފަ އެވެ.
ރިޔާޒްގެ މައްޗަށް އުފުލާފައިވާ މި ދައުވާ ސާބިތުވެއްޖެނަމަ ނުވަ މަހާއި 18 ދުވަހުގެ ޖަލު ހުކުމެއް އޭނާގެ މައްޗަަށް އިއްވާނެ އެވެ.
ރިޔާޒުގެ މައްޗަށް ދައުލަތުން ވަނީ އިތުރު ދައުވާއެއްވެސް އުފުލާފަ އެވެ. އެގޮތުން އުފުލާފައިވާ ދައުވާ އަކީ ރައްޔިތުންގެ މަޖިލީހުގެ އިދާރާއަށް ގަދަކަމުން ވަދެވަޑައިގެންނެވި ކަމަށް ބުނެ ގާނޫނު ތަންފީޒު ކުރާ މުވައްޒަފެއްގެ ވާޖިބަށް ގަސްދުގައި ހުރަސް އެޅުމުގެ ދައުވާ އެވެ.
މި މައްސަލާގައި ފުލުހުން ވަނީ ރިޔާޒުގެ މައްޗަށް ހަތަރު ތުހުމަތެއް ވެސް ކޮށްފަ އެވެ. އެގޮތުން ކުރާ ހަތަރު ތުހުމަތަކީ ހުއްދަ ނޫން ތަނަކަށް ވަނުމާއި، ފުލުހުންގެ ސަފު ފަޅާލުމާއި، މާރާމާރީ ހިންގުމަށް މަސައްކަތް ކުރުމުގެ އިތުރުން ފުލުހުންގެ ގާނޫނީ ވާޖިބަށް ހުރަސް އަޅާ ފުލުހުންގެ ގާނޫނީ ވާޖިބު އަދާކުރުމަށް ދަތިކުރުމުގެ ތުހުމަތެވެ.
މިދައުވާ ސާބިތުވެއްޖެ ނަމަ ރިޔާޒްގެ މައްޗަށް ހަތަރު މަހާއި 24 ދުވަހުގެ ޖަލު ހުކުމެއް އިއްވާނެ އެވެ.
މި ދެ ދައުވާގެ އިތުރަށް ރިޔާޒްގެ މައްޗަށް ދައުލަތުން އުފުލާފައިވާ އިތުރު މައްސަލައެއް މިހާރު ވެސް ހައި ކޯޓުގައި ހިނގަމުން އެބަދެ އެވެ. އެއީ މިދިޔަ އަހަރުގެ މާޗް މަހު ކޯޓު އަމުރެއްގެ ދަށުން ރިޔާޒުގެ ފޯނު ފުލުހުން ހިފަހައްޓައި، ފޯނު ހުޅުވަން އެންގުމުން އެކަން ނުކުރެއްވި ކަމަށް ބުނާ މައްސަލަ އެވެ.
މިމައްސަލާގައި ރިޔާޒްގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމް ކުރުމުން މިމައްސަލަ ހައިކޯޓުގައި އިސްތިއުނާފް ކުރީ ދައުލަތުގެ ފަރާތުންނެވެ.
