މި ސީޒަނުގައި ލިވަޕޫލަށް ތަފާތު މޮޅު ކުޅުމެއް ދައްކަމުން އަންނަ މިސްރުގެ ވިންގް މުހައްމަދު ސަލާހު ކޮށްދިން ހަތަރު ލަނޑުން ލިވަފޫލް ވަޓްފޯޑްގެ މައްޗަށް ފަސޭހަ މޮޅެއް ހޯދައިފިއެވެ.
އިނގިރޭސި ޕްރިމިއަ ލީގުގައި ރޭ މިދެޓީމް ކުޅުނު މެޗު ލިވަޕޫލްއިން ކާމިޔާބުކޮށްފައިވަނީ 5-0 ލަނޑުންނެވެ.
ލިވަޕޫލްގެ ފަރާތުން މުޅިމެޗު ކޮންޓުރޯލްކޮށް މޮޅު ކުޅުމެއް ދެއްކި މިމެޗުގެ ހަތަރުވަނަ މިނެޓްގައި ސަލާހު ވަނީ އެޓީމަށް ލީޑު ނަގާދީފައެވެ. އަދި ފުރަތަމަ ހާފް ނިމެން ދެ މިނެޓަށް ވެފައިވަނިކޮށް އޭނާ ވަނީ ލިވަޕޫލްގެ ދެވަނަ ގޯލު ކާމިޔާބުކޮށްދިނީ ލިވަޕޫލްގެ ލީޑޫ ފުޅާކޮށްދީފައެވެ.
ދެ ގޯލުގެ ލީޑަކާ އެކު ފުރަތަމަ ހާފް ލިވަޕޫލް އިން ނިންމާލިއިރު ރޭގެ މެޗުގައި މޮޅު ކުޅުމެއް ދެއްކި ސަލާޙް ވަނީ އެނާ ތަނަވަސް ކޮށްދިން ފުރުސަތަކުން ލިވަޕޫލްގެ ތިންވަނަ ލަނޑު ޖަހަން މަގު ފަހި ކޮށްދީފައެވެ. ތިންވަނަ ލަނޑު ދެވަނަ ހާފްގެ ކުރީކޮޅު ކާމިޔާބުކޮށްދިނީ ރޮބާޓޯ ފަމީނޯއެވެ.
ލިވަޕޫލްގެ ހަތަރުވަނަ ލަނޑު މެޗުގެ 77 ވަނަ މިނެޓްގައި ކާމިޔާބުކޮށް ސަލާހު ވަނީ އޭނާގެ ހެޓްރިކް ފުރިހަމަކޮށް ސަލާޙް ހެޓްރިކް ހެދި އެރު އޭނާ ވަނީ މެޗުގެ 85 ވަނަ މިނެޓްގައި އިތުރު ލަނޑެއް ކާމިޔާބުކޮށްދީފެއެވެ.
ރޭގެ މެޗުގައި ކާމިޔާބުކުރި ހަތަރު ގޯލާ އެކު މި ސީޒަނުގެ ޕްރިމިއަރ ލީގުގައި ސަލާހު ކާމިޔާބުކުރި ގޯލުގެ އަދަދު މިހާރު ވަނީ 28 އަށް އަރާފައެވެ.
މި މޮޅާ އެކު ލިވަޕޫލް މިހާރު އޮތީ ޕްރިމިއަރ ލީގުގެ ތިންވަނައިގައި 63 ޕޮއިންޓާ އެކުއެވެ. ލިވަޕޫލް ތިންވަނައިގައި އޮތް އިރު ހަތަރުވަނައިގައި އޮތް ޓޮޓެންހަމް 61 ޕޮއިންޓާ އެކުއެވެ. ރޭގެ މެޗުން ބަލިވި ވޮޓްފޯޑް އޮތީ 36 ޕޮއިންޓާ އެކު ލީގުގެ 11 ވަނައިގައެވެ.
