ތިމާއަށް ކުރެވެން ހުރި ހުރިހާ ރަނގަޅު ކަމެއް ކުރާށެވެ. އަހަރެމެންނަކީ އިންސާނުން ކަމުން ކުށް ކުރެވޭނެއެވެ. ކުޑައިރު ނުވަތަ ނުވިސްނޭ އިރު ހުރިހާ ކަމެއް ކުރެވިފައިވާނީ މާ ރަގަޅަކަށް ނޫނެވެ. އެހެންނަމަވެސް މިއަދު އަހަރެމެންނަށް ރަނގަޅު ގޮތުގައި ދިރިއުޅުން ހޭދަ ކުރެވިދާނެއެވެ. ތިރީގައި މިވަނީ ހަމަ ކޮންމެ މީހަކަށް ވެސް ކަންތައް ކުރެވިދާނެ ރަނގަޅު ގޮތްތަކެކެވެ.

1. ކޮންމެ ދުވަހަކުވެސް ނިދާ ހޭލައިގެން ތިމާއަށް ކުރެވިފައިވާ ރަނގަޅުކަމަކަށް އަމިއްލަ ނަފްސަށް ތާރީފު ކުރާށެވެ. ތިމާގެ ކިބައިގައި ހުރި ކޮންމެވެސް ރަނގަޅު ސިފައެއް، ރީތި ގޮތެއް ހަނދާންކޮށް އެކަމަށް އުފާ ކުރާށެވެ. ތިމާގެ އަމިއްލަ ނަފްސާމެދު އުފާވުމުން އެއުފާ އެހެން މީހުންނާ ހަމަޔަށް ވެސް ފޯރާނެއެވެ.
2. އެހެންމީހުންގެ ބޮލުގައި ކަންކަމުގެ އިލްޒާމު ނާޅުވާށެވެ. ބައިވެރިޔާ ނުވަތަ ވެރި މީހާ ނޫނީ ތިމާގެ ގާތަށް ކަމަކު އަންނަ މީހާގެ ކުށް ދެއްކުމަކުން ވާނެ މޮޅެއް ނެތެވެ. އެހެން ނަހަދާވެސް މަސައްކަތުގެ މާހައުލުގައި ނުވަތަ ގޭގައި އުފަލުން އުޅެވޭނެއެވެ. ތިމާއަށް ކުރެވޭ ކުށްތައް ދެނެގަނެ އެކަންތައް އަމިއްލަ ކޮށްގަންނާށެވެ. މިހެން ހަދަން ފެށުމުން ތިމާގެ ޝަޚުސިއްޔަތު ރަގަޅުވެގެން ދާނެއެވެ.
3. ރުޅި ދޫކޮށްލާށެވެ. ރުޅިއަކީ ތަބީއީ ކަމެއް މެެވެ. އެހެންނަމަވެސް އެ ޖަޒްބާތު ނުބައިން ނުބަޔަށް ދިޔަ ނުދޭށެވެ. އެއީ ސިއްހަތަށް ވެސް ގެއްލުން ހުރި ކަމެއް މެއެވެ. ހޯދުންތަކުން ދައްކާ ގޮތުގައި ރުޅިއަކީ ހަޖަމުކުރުމުގެ ނިޒާމު ހަމައިން ނައްޓުވާ ކަމެކެވެ. އަދި ނިދިވެސް ގެއްލުވާނެއެވެ. އަދި އެއީ ހިތުގެ ބަލިތަކަށް ވެސް މަގުފަހިވާކަމެކެވެ. ޑޮކްޓަރުން ލަފާދޭ އެއްކަމަކީ ރުޅި އަންނަން ދިމާވާކަންތައް އެއްޗެއްގައި ލިއުމެވެ. އަދި އެކަމާމެދު ހަމަޖެހިގެން ހުރެ ވިސްނުމެވެ.
4. މައާފު ކުރަން ފަރިތަކުރާށެވެ. މާޒީގައި ހިނގާފައިވާ ކަމެއް މިއަދު ދެމެހެއްޓުމުގެ މާނައެއް ނެތެވެ. އެތަޖްރިބާ ފަހަތަށް ދޫކޮށްލާށެވެ. އެކަމާ ފުންކޮށް ވިސްނުމަށް ފަހު ބުއްދީގެ ބޭނުން ހިފާށެވެ. އަދި އެކަންތައް ހިތުން ފިލުވައި ގެއްލުވާލާށެވެ. ހިތާ ހިތުން މިހެން ބުނާށެވެ. “އަހަރެން ކަލެއަށް މައާފު ކޮށްފީމެވެ. ކަލޭ ގައިދުން މިންޖު ކޮށްފީމެވެ. “
5. ތެދުވެރިވާށެވެ. ސީދާސީދާވާށެވެ.

ވިޔަފާރީގައި ގުޅުން އޮންނަ ނުވަތަ އެކީގައި އުޅޭ މީހަކު ތިމާއަށް ދޮގެއް ހަދައިފިނަމަ ހިތަށް އަރާނީ ކީކޭހެއްޔެވެ؟ އެއީ އޭނާގެ އިތުބާރު ގެއްލިގެން ދާނެ ކަމެއްކަން ކަށަވަރެވެ. އެހެންކަމުން ތިމާ އަބަދުވެސް ތެދަށް ބުނެވޭތޯ ބަލަންވާނެއެވެ. އަދި ބުނާ ހުރިހާ އެއްޗެއް ފޮރުވުމެއް ނެތި ސީދާ ސާދާކޮށް ބުނަންވާނެއެވެ. ހިތަށް އަރާ އެއްޗެއް އަދި ކުރެވޭ އހްސާސްތައް ސާފުކޮށް ދުލުން ބުނަން ފަރިތަ ކުރާށެވެ.

AD

6. އެހީތެރިވާށެވެ.

އިށީނދެ އިންނަ ގޮނޑި ދުވަސްވީ މީހަކަށް ދިނުން ފަދަ ކަންތައް ކުރާށެވެ. އެކީގައި އުޅޭ މީހަކަށް ކަމެއް ނުކުރެވިގެން އުޅޭ އިރު އެކަމުގައި އެހީވެދޭށެވެ. މީހަކަށް ލުޔެއްދެވެން އޮތްގޮތެއް ބަލާށެވެ. އެއީ ރަނގަޅު މީހަކަށް ވުމަށް ކުރެވިދާނެ ވަރަށް ކުޑަ ކަމެއް ވެސް މެއެވެ.

7. އެހެން މީހުން ދައްކާވާހަކަ އަޑުއަހާށެވެ. ކޮންމެ މީހަކުވެސް ދައްކާނީ އޭނާގެ ހިތުގައި ހުންނަ ވާހަކަތަކެވެ. އެހެންކަމުން އެހެން މީހުންގެ ހިތުގެ އަޑުއަހާށެވެ. ވާހަކައެއް މީހަކު ދައްކާނަމަ އެވާހަކައަށް ސަމާލުކަންދީ އަޑުއެހުމަކީ ރަނގަޅު އަޚުލާގުގެ ތެރޭގައިވެސް ހިމެނޭ ކަމެކެވެ.
8. އާންމުކަންކަމުގައި ބައިވެރިވެދޭށެވެ.

ފަގީރަކަށް އެއްޗެއް ދިނުން. ފަންޑުފޮށްޓަކަށް ހަދިޔާ ކުރުން، އެހެން ބަޔަކަށް ފައިދާއެއްވާނެ ކޮންމެވެސް ކަމެއް ކޮށްދިނުން އެއީވެސް ތިމާއަކީ ރަގަޅު މީހަކަށް ވެވިދާނެ ގޮތެކެވެ. ދުނިޔޭގައި ހުރި ހުރިހާ މައްސަލަތަކެއް ތިމާއަށް ހއްލު ކޮށެއް ނުދެވޭނެއެވެ. އެކަމަކު ކުޑަނަމަވެސް އެއްކަމެއް ކޮށްދެވިދާނެއެވެ.

9. އަބަދުވެސް މަޑުމައިތިރި ވާށެވެ. މީހަކަށް “ޝުކުރިއްޔާ” އެއް ދެވެން އޮތް ގޮތެއް ހޯދާށެވެ.

އެހެން މީހަކު ވަނުމަށް ދޮރު ހުޅުވާލަ ދިނުން ފަދަ ކަމެއް އަބަދުވެސް ކުރާށެވެ. އަނެކާ ކިތަންމެ ގޯސްކޮށް ކަންތައް ކުރިޔަސް ތިމާގެ ކިބައިން ރިވެތި އަޚުލާގު ދައްކާށެވެ.

10. ތިމާގެ ގޮތުގައި ހުންނާށެވެ.

ހެޔޮގޮތުގައި ހުރުން ދޫކޮށް ނުލާށެވެ. އެހެންމީހަކަށް ދެއްކުމަށް ކަމެއް ނުކުރާށެވެ. ތިމާގެ އަމިއްލަ އިމެއް ގާއިމު ކުރާށެވެ. ރަނގަޅު ގޮތް އިޚްތިޔާރު ކުރާށެވެ.

11. ބަދަލަކަށް ހުޅުވި ހުންނާށެވެ.

ތިމާގެ ކިބައިން ގޯހެއް ހެދޭނަމަ އެކަމެއް ބަދަލު ކޮށްލަން ތައްޔާރުގައިވާށެވެ. ނުވަތަ އާކަމެއް އާގޮތަކަށް ކުރުމަށް ދެކޮޅު ނަހަދާށެވެ. ކުރީގައި ކޮށް ފަރިތަ ނޫން ކަންތައްވެސް ކުރާށެވެ. ރައްޓެހި ނޫން މީހުންނާވެސް ވާހަކަ ދައްކާށެވެ.

12. އިހުތިރާމް ކުރާށެވެ.

ތިމާ ދެންމެއަކު ސާފު ކޮށްފައި ހުރިތަނަކަށް ކިލާ ފައިވާނަކާއެކު މީހަކު ވަނީމާ ތިމާއަކަށް ވެސް ނުރުހެވޭނެއެވެ. އެހެން ކަމުން ތިމާވެސް ގެޔަކަށް ނޫނީ ތަނަކަށް ވަންނަ އިރު ފައިވާން ބޭރުގައި ބަހަށްޓަން ޖެހޭތޯ ބަލަން ވާނެއެވެ. އެތަން މިތަނަށް ކުނި ނާޅާށެވެ. އެހެން މީހުންގެ ބަސްތަކަށާއި ވިސްނުމާއި ޚިޔާލާއި ދިރިއުޅުމުގެ ވައްޓަފާޅިއާއި ކަންތައް ކުރާގޮތަށް އިހުތިރާމް ކުރާށެވެ. އެކަންތަކާ ތިމާ ނުރުހުނަސް ފާޑު ނުކިޔާށެވެ.

13. ހުސްއަތާ ގެޔަކަށް ނުދާށެވެ.

ރައްޓެއްސެއްގެ ގެޔަށް ނުވަތަ ޕާޓީއަކަށް ދާއިރު އެއްޗެއް ގެންދާށެވެ. ގޭގައި ހެދި ކާއެއްޗެއް ކިތަންމެ ކުޑަ މިންވަރެއް ނަމަވެސް ނުވަތަ ކުޑަ ހަދިޔާއެއް ނަމަވެސް ތަނަކަށް ޒިޔާރަށް ކުރާއިރު ގެންދެވިދާނެއެވެ.

14. ދަސްކުރާށެވެ.

ކަންކަމުގެ ރަނގަޅު ނުރަނގަޅު ހެޔޮ ގޮތްތައް ބަލައި ދަސްކުރާށެވެ. ރަނގަޅު މީހުން ކަންތައް ކުރާގޮތް ފާހަގަ ކުރާށެވެ. ގޯސްކަންތަކާއި އާދަތައް ގައިގައި ނުލާށެވެ.

15. އަބަދުވެސް ހިނިތުންވެލަން ތައްޔާރަށް ހުންނާށެވެ. އެގޮތުންވެސް ކުޑަ ހިތްހަމަ ޖެހުމެއް ދެވޭތޯ ބަލާށެވެ.

ރަނގަޅު މީހަކަށް އެއްދުވަހަކުން ނުވެވޭނެއެވެ. އެހެންކަމުން މިފަދަ ކަންތައް ފާހަގަކޮށް މަޑުމަޑުން އާދަ ކުރަމުންގޮސް ރަނގަޅު ހެޔޮ އަދި މާތް މީހަކަށް ހަމަ ކޮންމެ މީހަކަށް ވެސް ވެވިދާނެއެވެ.