ތުރުކީވިލާތުގެ އަންތާލިޔާގައި މިހާރު ކުރިއަށްދާ އދ. ގެ މޫސުމީ ބަދަލުތަކާ ބެހޭ ކޮންފަރެންސް (ކޮޕް31) ސަމިޓުގެ ހަވާސާގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސީޝެލްސްގެ ނައިބު ރައީސް ސަބާސްޓިއަން ޕިއްލޭއާ ބައްދަލުކުރައްވައިފިއެވެ. މި ބައްދަލުކުރެއްވުމުގައި ދެ ގައުމުގެ ދެމެދުގައި ވަނީ މޫސުމީ ބަދަލުތަކާ ދެކޮޅަށް އިންޓަނޭޝަނަލް ފެންވަރުގައި މަސައްކަތްކުރުމާ ގުޅޭގޮތުން މުހިންމު މަޝްވަރާތަކެއް ކުރިއަށް ގެންގޮސްފައެވެ.
މި މަޝްވަރާތަކުގައި ދެ ލީޑަރުންގެ މައިގަނޑު އަމާޒަކަށް ވެވަޑައިގެންނެވީ، ތަރައްގީވަމުން އަންނަ ކުދި ޖަޒީރާ ގައުމުތަކަށް މޫސުމީ ގޮންޖެހުންތަކުގެ ސަބަބުން ކުރިމަތިވަމުންދާ ނޭދެވޭ އަސަރުތަކާއި ލިބެމުންދާ ބޮޑެތި ގެއްލުންތައް ކުޑަކުރުމެވެ. މިކަމަށްޓަކައި އިންޓަނޭޝަނަލް މުޖުތަމައުގެ އެހީތެރިކަން އަވަހަށް ހޯދުމުގެ މުހިންމުކަމުގެ މައްޗަށް ދެ ބޭފުޅުން ވަނީ އަލިއަޅުއްވާލައްވާފައެވެ.
މީގެއިތުރުން، އިންޓަނޭޝަނަލް މަސްރަހުގައި ކުދި ޖަޒީރާ ގައުމުތަކުގެ ހައްގުގައި އެކުގައި ވަކާލާތުކުރެއްވުމަށާއި، މޫސުމީ ވިލުންތެރިކަން ހަރުދަނާކުރުމަށް ބޭނުންވާ މާލީ އެހީތެރިކަމާއި ވަސީލަތްތައް ހޯދުމަށް ދެ ގައުމު ގުޅިގެން މަސައްކަތްކުރެއްވުމަށް ދެ ބޭފުޅުން އެއްބަސްވެވަޑައިގެންނެވިއެވެ.
އދ. ގެ މޫސުމީ ބަދަލުތަކާ ބެހޭ މުއާހަދާގެ 31 ވަނަ ކޮންފަރެންސް އޮފް ދަ ޕާޓީސް (ކޮޕް31) ގެ ނަމުގައި ބާއްވާ މި ސަމިޓުގެ ހަރަކާތްތައް ކުރިއަށް ދަނީ މި މަހުގެ ނުވަޔަކުން 20 ވަނަ ދުވަހުގެ ނިޔަލަށެވެ. އަދި ދުނިޔޭގެ ވެރިންގެ މަތީ ފަންތީގެ ބައްދަލުވުންތައް ތާވަލުކޮށްފައި ވަނީ މި މަހުގެ 11 އިން 12 އަށެވެ.
