ޓޫރިސްޓުންނަށް ރާއްޖެއިން ބުކިން ހަދައިދޭ ބުކިން ޕްލެޓްފޯމްތަކާއި ޓުއާ އޮޕަރޭޓަރުންނާއި ޓްރެވެެލް އެެޖެންޓުންގެ އަތުން ޓީޖީއެސްޓީ ނަގާ ގޮތަށް ގާނޫނަށް ގެނައި ބަދަލުތަކަށް އިތުރު އިސްލާހުތަކެއް ގެންނަން ނިންމާފައިވާ ކަމަށް ޓޫރިޒަމް މިނިސްޓަރު މުހައްމަދު އަމީން ވިދާޅުވެއްޖެއެވެ.
އޮކްޓޯބަރު މަހުން ފެށިގެން ބޭރުގެ ޓްރެވަލް އެޖެންޓުންގެ އަތުން ޓެކްސް ނަގާ ގޮތަށް ޖީއެސްޓީ ގާނޫނަށް ގެނައި އިސްލާހާމެދު ކަންބޮޑުވުން ފާޅުކޮށް، އެ އިސްލާހަށް އަމަލުކުރުން ފަސްކުރުމަށް ޔޫރަޕްގެ ޓުއާ އޮޕަރޭޓަރުންނާއި ޓުއާ އެޖެންޓުން ތަމްސީލްކުރާ ބައެއް އެސޯސިއޭޝަންތަކުން ދިވެހި ސަރުކާރާއި މީރާގައި ވަނީ އެދިފައެވެ
މިކަމާއި ގުޅިގެން މިނިސްޓަރު ވިދާޅުވީ މިވަގުތު ރައީސުލްޖުމްހޫރިއްޔާ ނިންމަވާފައިވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ގާނޫނަށް ވަރަށް އަވަހަށް ބަދަލުތަކެއް ގެންނަން ކަމަށެވެ.
މިއަހަރުގެ ޓޫރިޒަމް ދުވަސް ފާހަގަކުރުމުގެ ގޮތުން ބޭއްވި ހާއްސަ ހަފްލާގައި އަމީން ވިދާޅުވީ، 2040 ވަނަ އަހަރު ރާއްޖެ އެންމެ ތަރައްގީވެފައިވާ ގައުމަކަށް ހެދުމަށްޓަކައި ޓޫރިޒަމް ދާއިރާ ވެސް އިތުރަށް ޑައިވާސިފައި ކުރުމަށް މުހިއްމު ފިޔަވަޅުތަކެއް އަޅަމުން އަންނަ ކަމަށެވެ.
” ޓޫރިޒަމް ސެކްޓަރަށް 54 އަހަރު ފުރިގެން ދިޔަ އިރު ރާއްޖޭގެ ޓޫރިޒަމަކީ ދުނިޔޭގެ އެންމެ ބޮޑު މަގްބޫލުކަމެއް ލިބިފައިވާ އެއް މަންޒިލް. އެ ހިސާބަށް އާދެވުނީ ދާއިރާގައި މަސައްކަތް ކުރި ފަރާތްތަކުގެ ބޮޑު މަސައްކަތަކުން” އަމީން ވިދާޅުވިއެވެ.
ޓީޖީއެސްޓީ ނަގާ ގާނޫނުގައިވާ ގޮތުން އެފަދަ ބަދަލުތަކެއް ގެނައީ، އޯފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންނާއި ޓްރެވެލް އެޖެންޓުން ދޭ ހިދުމަތްތަކުން ޖީއެސްޓީ ނަގާނެ އުސޫލުތައް ޓެކްސް ގާނޫނަށް އިތުރުކުރުމެވެ. އެއީ ޓެކްސް ނެގުމުގެ ނިޒާމުގައި ހުރި ދަތިތައް ހައްލުކޮށް، އެ ނިޒާމު ހަރުދަނާކުރަން ގެންނަ ބަދަލުތަކެއް ކަމަށް ގާނޫނުގައިވެއެވެ. އެ ބަދަލުތަކާ އެކު ޓެކްސް ނަަގަން ފަށައިފި ނަމަ ބޭރުގެ ޓްރެވެލް އެޖެންޓުން ދައްކާ 299.3 މިލިއަން ރުފިޔާ އާއި ފޮރިން ޓުއާ އޮޕަރޭޓަރުން ދައްކާ 1.3 ބިލިއަން ރުފިޔާއާ އެކު ދައުލަތަށް އަހަރަކު 1.6 ބިލިއަން ރުފިޔާ އިތުރުވާނެ ކަމަށް ލަފާކޮށްފައިވެއެވެ.
އެ ގާނޫނަށް ގެނައި ބަދަލުތަކާ ހެދި ޔޫރަޕްގެ ބައެއް ޓުއާ އޮޕަރޭޓަރުން ރާއްޖެއަށް ބުކިން ހެދުން ވެސް ވަނީ މެދުކަނޑާލައިފައެވެ.
