ހާއްސަ އެހީއަށް ބޭނުންވާ ކުދިންނަށް ތައުލީމު ފޯރުކޮށްދިނުމުގައި ހުރި ދަތިތަކާއި ގޮންޖެހުންތައް ބައްލަވައި، އެކަމަށް އަވަސް އަދި ދެމެހެއްޓެނިވި ހައްލެއް ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ރައްޔިތުންގެ ކަންބޮޑުވުންތަކާއި ޝަކުވާތައް ސީދާ އެމަނިކުފާނާ ހިއްސާކުރުމަށް ސަރުކާރުން ކުރިއަށްގެންދާ “ރައްޔިތުންގެ އަޑު” ސިލްސިލާ ޕްރޮގްރާމުގެ ތެރެއިންނެވެ. މި ޕްރޮގްރާމުގައި ބެލެނިވެރިޔަކު ވަނީ އޭނާގެ ދަރިފުޅަކީ ޑައުން ސިންޑްރޮމް ހުންނަ ކުއްޖަކަށް ވުމުން، އަމިއްލަ ފަސް ސްކޫލަކުން އެ ކުއްޖާއަށް އެޑްމިޝަން ނުދީ ދެކޮޅު ހެދި މައްސަލައާއި، ހާއްސަ އެހީއަށް ބޭނުންވާ ކުދިންނަށް ކިޔަވައިދިނުމުގައި އާއިލާތަކުން ތަހައްމަލުކުރަން ޖެހޭ ތަކުލީފުތައް ރައީސްއާ ހިއްސާކޮށްފައެވެ.
އެ ބެލެނިވެރިޔާގެ ވާހަކަތައް އަޑުއެއްސެވުމަށްފަހު ރައީސް ޑރ. މުއިއްޒު ވިދާޅުވީ، އެންމެން ޝާމިލުކޮށްގެން ކަންކަން ކުރިއަށް ގެންދިއުމަކީ (އިންކްލޫސިވިޓީއަކީ) އެމަނިކުފާނުގެ ސަރުކާރުން އެންމެ ބޮޑު އިސްކަމެއް ދެއްވާ އެއް ސިޔާސަތު ކަމަށެވެ. އަދި ހުރިހާ ދަރިވަރުންނަށް ވެސް ހަމަހަމަކަމާއެކު ތައުލީމީ ފުރުސަތުތައް ފަހިކޮށްދިނުމަކީ ކޮންމެހެން ކުރަންޖެހޭ ކަމެއް ކަމުގައި އެމަނިކުފާނު ފާހަގަކުރެއްވިއެވެ.
ރައީސް އިތުރަށް ވިދާޅުވީ، ހާއްސަ އެހީއަށް ބޭނުންވާ ފަރާތްތަކަށާއި، ވަކިން ހާއްސަކޮށް ޑައުން ސިންޑްރޮމް ހުންނަ ކުދިންގެ ކިޔެވުމަށް ހުރި ހުރަސްތައް ނައްތާލުމަށް ސަރުކާރުން ހާއްސަ މަސައްކަތްތަކެއް ކުރައްވާނެ ކަމަށެވެ. މިގޮތުން ސްކޫލުތަކުން ޖާގަ ނުލިބޭ މައްސަލައާއި ތައުލީމީ ނިޒާމުގެ ތެރޭގައި ހުރި މިފަދަ އުނިކަންކަން ބައްލަވައި އިސްލާހުކުރައްވާނެ ކަމަށް ވިދާޅުވިއެވެ.
މިފަދަ ހަގީގީ ކަންބޮޑުވުންތައް ސަރުކާރުގެ ސަމާލުކަމަށް ގެނެސްދިނުމަކީ ކަންކަން ރަނގަޅުކުރުމަށް ލިބޭ ބާރެއްކަން ފާހަގަކުރައްވައި ރައީސް ވަނީ އެ ބެލެނިވެރިޔާއަށް ޝުކުރު އަދާކުރައްވާފައެވެ. އަދި އޭނާ ފާހަގަކުރި ހުރިހާ ނުކުތާތަކަށް ބައްލަވައި، ކަމާބެހޭ ވުޒާރާތައް މެދުވެރިކޮށް އެދެވޭ އަވަސް ހައްލެއް ހޯއްދަވައިދެއްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
