ތިލަފުށީގައި ތަރައްގީކުރަމުން އަންނަ އައު ވިޔަފާރި ބަނދަރުގެ މަސައްކަތް އެއްކޮށް ނިމުމުން، ޕޯޓުގެ ހިދުމަތްތައް ކުރިއަށްވުރެ ހަތަރު ގުނަ އިތުރުވެ، ރާއްޖޭގެ އިގްތިސާދަށް ބޮޑު އިންގިލާބީ ކުރިއެރުމެއް ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ތިލަފުށީގެ އައު ޕޯޓު ސައިޓަށް ޒިޔާރަތްކުރައްވައި، މަޝްރޫއުގެ އެކި މަރުހަލާތަކުގެ މަސައްކަތްތައް ހިނގަމުންދާ ގޮތް ބައްލަވާލެއްވުމަށްފަހު ނޫސްވެރިންނާ ވާހަކަފުޅު ދައްކަވަމުންނެވެ. މަޝްރޫއުގެ ކުރިއެރުމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މަސައްކަތް ކުރިއަށްދާ ސްޕީޑާމެދު ވަރަށް ބޮޑަށް ހިތްޕުޅުހަމަޖެހިވަޑައިގަންނަވާ ކަމަށެވެ.
ރައީސް ޑރ. މުއިއްޒު ފާހަގަކުރެއްވި ގޮތުގައި މާލޭގެ މިހާރުގެ ވިޔަފާރި ބަނދަރަކީ މީގެ 40 އަހަރު ކުރީގެ އާބާދީއާއި ވިޔަފާރީގެ ހާލަތަށް ބަލައިގެން ހަދާފައިވާ ތަނަކަށްވާތީ، މިއަދުގެ އިގްތިސާދީ ހަރަކާތްތަކަށް އެ ބަނދަރު ކުޑަވެ، ޖާގައިގެ ދަތިކަން ވަނީ އިންތިހާއަށް ބޮޑުވެފައެވެ. ރާއްޖޭގެ އިގްތިސާދު މިހާރު ފުޅާވަމުން އަންނަ މިންވަރާއި، ސަރުކާރުން ރާވާފައިވާ ބިޔަ ތަރައްގީގެ މަޝްރޫއުތަކަށް މަގުފަހިކުރުމަށްޓަކައި ޒަމާނީ ބޮޑު ބަނދަރެއް ކޮންމެހެންވެސް ބޭނުންވާކަމަށް އެމަނިކުފާނު ވިދާޅުވިއެވެ.
ސަރުކާރުން ކަނޑައަޅާފައިވާ އަމާޒަކީ އަންނަ އަހަރުގެ ނޮވެމްބަރު މަހުގެ 11 ވަނަ ދުވަހުގެ ނިޔަލަށް ޕޯޓުގެ ހިދުމަތްތައް ތިލަފުށްޓަށް ބަދަލުކުރުމެވެ. އަދި 2027 ވަނަ އަހަރުގެ ތެރޭގައި ޕޯޓުގެ ހުރިހާ އޮޕަރޭޝަންތަކެއް އެއްކޮށް ތިލަފުށްޓަށް ބަދަލުވެ، 2028 ވަނަ އަހަރުގެ ނިޔަލަށް މުޅި މަޝްރޫއު ފުރިހަމަކޮށް ނިމުމުން، ވެރިރަށް މާލޭގެ މަގުތަކުގެ ތޮއްޖެހުމަށް ދާއިމީ ހައްލެއް ލިބިގެންދާނެ ކަމަށް ވެސް ރައީސް ފާހަގަކުރެއްވިއެވެ.
މިވަގުތު ތިލަފުށީގައި ކުރިއަށްދާ އެތެރޭގެ އުޅަނދުފަހަރަށް ހާއްސަ ޑޮމެސްޓިކް ކީވޯލްގެ މަސައްކަތް މި މަހުގެ ފަހުކޮޅު ނިންމައި، ހިދުމަތް ދޭން ފެށޭނެ ކަމަށް ވަނީ ހާމަކޮށްފައެވެ. މި މަޝްރޫއުގެ ބައެއް މަސައްކަތްތައް މާލޭގެ އިންޑަސްޓްރިއަލް ޒޯނަށް ވެސް ބަދަލުކުރުމަށް ވަނީ ހަމަޖެހިފައެވެ.
ރައީސްގެ މި ޒިޔާރަތުގައި އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދާއި، ސަރުކާރުގެ އިސް ބޭފުޅުންނާއި، އެމްޕީއެލްގެ ސީއީއޯ އަދި ބައިނަލްއަގުވާމީ ކީވޯލްގެ މަސައްކަތް ކުރިއަށްގެންދާ ޗައިނާ ކުންފުނީގެ އިސްވެރިން ބައިވެރިވެވަޑައިގެންނެވިއެވެ.
