ލޭ ހަދިޔާކުރާ މީހާ ހުރި ތަނަކަށް ގޮސް މޯބައިލްކޮށް ލޭ ނެގޭނެ އިންތިޒާމު ހަމަޖެއްސުމުގެ ހިދުމަތެއް ތައާރަފުކުރުމަށް ތައްޔާރުވަމުންދާކަމަށް ސިއްހަތާއި އާއިލާއާއި އިޖުތިމާއީ އެހީއާބެހޭ ވަޒީރު ޑރ. ގީލާ އަލީ ވިދާޅުވެއްޖެއެވެ.
އަހާށޭ ބުނާނަން” ޕްރޮގްރާމުގައި ވާހަކަދައްކަވަމުން ވަޒީރު ވިދާޅުވީ، ލޭ ދިނުމަށް އެދޭ ފަރާތްތަކަށް ވީހާވެސް ލުއިފަސޭހަ ގޮތްތަކެއް ހޯދައިދިނުމަކީ ސަރުކާރުގެ އަމާޒެއް ކަމަށެވެ. އެގޮތުން، ވަގުތު ނެތުމުގެ ސަބަބުން ސެންޓަރުތަކަށް ދާން އުނދަގޫވާ ފަރާތްތަކަށް އަމާޒުކޮށްގެން، ރައްޔިތުންނާ ވީހާވެސް ގާތުން މޯބައިލްކޮށް ލޭ ނަގައި ސްޓޯރޭޖް ފެސިލިޓީތަކަށް ގެންދެވޭނެ އިންތިޒާމު ވަރަށް އަވަހަށް ތައާރަފުކުރެވިގެންދާނެ ކަމަށް ވަޒީރު ފާހަގަކުރެއްވިއެވެ.
މީގެ އިތުރުން، ލޭ ދޭން އަންނަ ބައެއް މީހުންގެ ކްރައިޓީރިއާ ހަމަނުވުމުގެ ސަބަބުން ލޭ ނުނެގޭ ހާލަތްތައް ދިމާވާކަމަށާއި، އެކަމުގެ ސަބަބުންވެސް ލޭ ހޯދުމަށް ގޮންޖެހުންތަކާ ކުރިމަތިވާކަން ވަޒީރު ފާހަގަކުރެއްވިއެވެ.
ލޭ ލިބުމުގެ ދަތިކަން ހައްލުކުރުމަށް އެޅިފައިވާ ފިޔަވަޅުތަކުގެ ތެރޭގައި ލޭ ރައްކާކުރެވޭނެ 4 ބްލަޑް ބޭންކެއް އަތޮޅުތެރޭގައި މިހާރު ވަނީ ގާއިމުކޮށްފައެވެ.
މޯލްޑިވިއަން ބްލަޑް ސާވިސަސްގެ ތަފާސްހިސާބުތަކުން ދައްކާގޮތުގައި ރާއްޖޭގައި 668 މީހަކު ގަވާއިދުން ތެލެސީމިއާއަށް ލޭ އަޅައެވެ. މީގެ ތެރެއިން 163 މީހުން މާލޭ ސަރަހައްދުގައި ރެޖިސްޓްރީވެފައިވާއިރު، 505 މީހުން ރެޖިސްޓްރީވެފައިވަނީ އަތޮޅުތަކުގައެވެ.
ވަޒީރު އިތުރަށް ވިދާޅުވީ، ދައުލަތުން ކެނޑިނޭޅި ވަސީލަތްތައް ގާއިމުކުރި ނަމަވެސް، ތެލަސީމިއާ ކުދިންނާއި، އެކިއެކި އޮޕަރޭޝަންތަކަށް ބޭނުންވާ ލޭ ހޯދުމުގައި ދިމާވާ ދަތިތަކަށް ދާއިމީ ހައްލެއް ލިބޭނީ ލޭ ހަދިޔާކުރާ މީހުންގެ އަދަދު އިތުރުކުރެވިގެން ކަމަށެވެ.
