ރ. އަނގޮޅިތީމުގައި އުމުރުން 72 އަހަރުގެ ދިވެހި އަންހެނަކު ނަމާދަށް ހުއްޓައި، މަރާލާނެ ކަމަށް ބުނެ ބިރުދައްކައި ޖިންސީ ގޯނާކުރި ކަމުގެ ތުހުމަތުގައި ފިރިހެނަކު ހައްޔަރުކޮށްފިއެވެ. ކޯޓު އަމުރެއްގެ ދަށުން ރޭ ހައްޔަރުކޮށްފައިވަނީ އުމުރުން 44 އަހަރުގެ ދިވެހި ފިރިހެނެކެވެ.
ފުލުހުންގެ މީޑިއާ އޮފިޝަލް ވިދާޅުވީ، އަނގޮޅިތީމުގައި ދޮށީ އުމުރުގެ އަންހެނަކަށް މިފަދަ އަނިޔާއެއް ދިން ކަމުގެ ރިޕޯޓް ފުލުހުންނަށް ލިބުނީ ރޭ 8:30 ހާއިރު ކަމަށެވެ. އަދި މި މައްސަލައިގެ ތުހުމަތުގައި އެ ފިރިހެން މީހާ ހައްޔަރުކޮށްފައިވަނީ ރޭ 9:57 ހާއިރު ކަމަށް ފުލުހުން މައުލޫމާތު ދެއެވެ.
އެނގިފައިވާ ގޮތުގައި މި ހާދިސާ ހިނގާފައިވަނީ އެ އަންހެން މީހާ އަމިއްލަ ގޭގެ ކޮޓަރީގައި ރޭ އިޝާ ނަމާދަށް ހުއްޓައެވެ. މި ހާދިސާ ހިނގަން މެދުވެރިވި ސަބަބާއި، ހާދިސާ ހިނގައިދިޔަ ގޮތުގެ އިތުރު ތަފްސީލެއް ރަސްމީ އެއްވެސް އިދާރާއަކުން އަދި ހާމަކޮށްފައެއް ނުވެއެވެ.
މި ހާދިސާގައި އަނިޔާ ލިބުނު އުމުރުން ދުވަސްވީ އަންހެން މީހާއަށް އެ ރަށު ސިއްހީ މަރުކަޒުގައި ފަރުވާ ދީފައިވާ ކަމަށް ފުލުހުން ބުންޏެވެ. އަދި ފަރުވާއަށް ފަހު މިހާރު އޭނާ ސިއްހީ މަރުކަޒުން ދޫކޮށްލާފައިވާ ކަމަށް ވެސް ފުލުހުންގެ އޮފިޝަލް ކަށަވަރުކޮށްދެއްވިއެވެ.
ފުލުހުން ބުނީ މި މައްސަލައަކީ ވަރަށް ސީރިއަސް މައްސަލައެއްގެ ގޮތުގައި ބަލަމުން އަންނަ މައްސަލައެއް ކަމަށެވެ. އަދި މި ހާދިސާއާ ގުޅިގެން ބަލަންޖެހޭ ކަންކަން ބަލައި، އަޅަންޖެހޭ ގާނޫނީ ފިޔަވަޅުތައް އެޅުމަށްޓަކައި މި މައްސަލަ އިތުރަށް ތަހުގީގު ކުރަމުން އަންނަ ކަމަށް ވެސް ފުލުހުން ވަނީ ބަޔާންކޮށްފައެވެ.
