އަބޫދާބީގައި ކުރިއަށްދާ ބައިނަލްއަގުވާމީ ޖިނާއީ އަދުލުގެ ކޮންގްރެސްގެ ހަވާސާގައި، ގައުމުތައް ހުރަސްކޮށް ހިންގާ ބޮޑެތި ކުށްތަކާއި ސައިބާކްރައިމް ހުއްޓުވުމަށް ބައިނަލްއަގުވާމީ ފަރާތްތަކާ ގުޅިގެން އިތުރު އެއްބާރުލުން ހޯދުމުގެ މަސައްކަތް ދިވެހިރާއްޖެއިން ފަށައިފިއެވެ.
ޕްރޮސިކިއުޓާ ޖެނެރަލް އައްބާސް ޝަރީފް، އިމިރޭޓްސް ނިއުސް އޭޖެންސީ (ވާމް) އަށް ދެއްވި އިންޓަވިއުއެއްގައި ވިދާޅުވީ، މި ކޮންގްރެސްގައި ރާއްޖެއިން ބައިވެރިވުމުގެ މައިގަނޑު މަގުސަދަކީ ޔޫއޭއީ އާއި ބައިވެރިވާ އެހެން ގައުމުތަކާއެކު އޮންނަ ގުޅުން ބަދަހިކޮށް، އިންޓަނެޓް މެދުވެރިކޮށް ހިންގާ ކުށްތައް ހުއްޓުވުމުގައި ގުޅިގެން މަސައްކަތް ކުރުން ކަމަށެވެ.
އެގޮތުން ގައުމުތައް ހުރަސްކޮށް ހިންގާ ކުށްތަކާއި މަކަރާއި ހީލަތުން ފައިސާ ހޯދުމުގެ މައްސަލަތައް ހުއްޓުވުމަށް ގާނޫނީ އޮނިގަނޑު ހަރުދަނާކުރުމާއި ރާއްޖެއިން ފަށާފައިވާ އާޓިފިޝަލް އިންޓެލިޖެންސް (އޭއައި) އިނިޝިއޭޓިވް އިތުރަށް ތަރައްގީކޮށް، ކުށްތައް ތަހުގީގުކުރުމާއި ދައުވާކުރުމުގައި އޭއައިގެ ބޭނުން ހިފުމަށް ބައިނަލްއަގުވާމީ އެހީތެރިކަން ހޯދުން ކަމަށް އޭނާ ވިދާޅުވިއެވެ.
މި ކޮންގްރެސްގެ ތެރެއިން ދުނިޔޭގެ އެކި ގައުމުތަކުގެ ޕްރޮސިކިއުޓާ ޖެނެރަލުންނާއި އިސް ބޭފުޅުންނާއެކު ބޭއްވި ބައްދަލުވުންތަކުގެ ސަބަބުން ކުރިމަގުގައި އެހީތެރިކަން ބަދަލުކުރުމަށް އައު ފުރުސަތުތަކެއް ފަހިވެގެންގޮސްފައިވާކަން އައްބާސް ޝަރީފް ފާހަގަކުރެއްވިއެވެ
