ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި އަލަށް ތަރައްގީކޮށްފައިވާ ފްލެޓްތަކަށް ދިރިއުޅުން ބަދަލުކުރާ މީހުންނަށް ހާއްސަކޮށްގެން އުރީދޫ މޯލްޑިވްސް އިން ހާއްސަ އޮފާއެއް މިއަދު ތައާރަފުކޮށްފިއެވެ. މި އޮފާގެ ދަށުން، އާ ފްލެޓްތަކަށް ބަދަލުވާ މީހުން އުރީދޫ ސުޕަނެޓް ހިދުމަތަށް އެދޭތާ 24 ގަޑިއިރުގެ ތެރޭގައި އެ ހިދުމަތް ގުޅައިދޭނެ ކަމަށް އެ ކުންފުނިން ބުންޏެވެ.
އެއް ދުވަހުގެ ތެރޭގައި އިންޓަނެޓް ގުޅައިދިނުމުގެ އިތުރުން، މި އޮފާގެ ދަށުން ކަސްޓަމަރުންނަށް އިތުރު ފައިދާތަކެއް ވެސް ލިބިގެންދާނެއެވެ. އެގޮތުން، ކޮންމެ ސުޕަނެޓް ކަނެކްޝަނަކާއެކު މަހު ފީއެއް ދައްކަން ނުޖެހޭ ހިލޭ ޓެލެފޯނެއް ލިބޭނެ ކަމަށް އުރީދޫން ބުންޏެވެ. އަދި މީގެ އިތުރުން، ހިލޭ ގުޅޭނެ 1،000 މިނެޓު ވެސް ކޮންމެ ކަސްޓަމަރަކަށް ލިބިގެންދާނެ ކަމަށް އެ ކުންފުނިން މައުލޫމާތު ދެއެވެ.
އުރީދޫ ސުޕަނެޓް ހިދުމަތް ހޯދާ ފަރާތްތަކަށް އެ މީހެއްގެ ގޭބިސީގެ ބޭނުންތަކާ ގުޅޭގޮތުން އެކި ޕެކޭޖުތައް ހިޔާރުކުރުމުގެ ފުރުސަތު އޮންނާނެއެވެ. އެ ކުންފުނީގެ ވަރުގަދަ ނެޓްވޯކް އިންފްރާސްޓްރަކްޗާގެ އެހީގައި، ގޭގައި ގެންގުޅޭ ހުރިހާ ޑިވައިސްތަކަކުން ވެސް ވަރަށް ފަސޭހަކަމާއެކު އިތުބާރު ހުރި އަދި ފެންވަރު ރަނގަޅު އިންޓަނެޓް ހިދުމަތެއް ކަސްޓަމަރުންނަށް ލިބޭނެ ކަމުގެ ޔަގީންކަން އުރީދޫން ވަނީ ދީފައެވެ.
މި ޒަމާނުގައި އިންޓަނެޓަކީ ދިރިއުޅުމުގެ އެންމެ ޒަރޫރީ އެއް ބޭނުންކަން ފާހަގަކުރަމުން އުރީދޫން ބުނީ، އެ ކުންފުނީގެ އެންމެ ބޮޑު އަމާޒަކީ އާ ފްލެޓްތަކުގައި ދިރިއުޅެން ފަށާ އާންމުންނަށް ވީހާވެސް ފަސޭހަކަމާއެކު އިންޓަނެޓް ފޯރުކޮށްދިނުން ކަމަށެވެ. އެހެންކަމުން ސުޕަނެޓަށް އެދި ހުށަހަޅާތާ އެއް ދުވަސް ތެރޭގައި ކަނެކްޝަން ގުޅައިދިނުމުން، ޑިޖިޓަލް އެކި ބޭނުންތަކަށް އަވަހަށް އޮންލައިންވެވޭނެ ކަމަށް އެ ކުންފުނިން ބުންޏެވެ.
އެފްޑީސީން ހުޅުމާލޭގައި އިމާރާތްކޮށްފައިވާ އާ ފްލެޓްތަކަށް ގިނަ ބަޔަކު މިހާރު ދިރިއުޅުން ބަދަލުކުރަމުން އަންނައިރު، އުރީދޫގެ މި ހާއްސަ އޮފާގެ ސަބަބުން ޑިޖިޓަލް ހިދުމަތްތައް ހޯދުމަށް ފަސޭހަވެގެންދާނެއެވެ. ކުރު މުއްދަތެއްގެ ތެރޭގައި އިންޓަނެޓް ލިބުމަކީ، އާ ގެއަކަށް ބަދަލުވާ އާއިލާތަކަށް އޮންލައިންކޮށް ކުރަންޖެހޭ ކަންކަން ފުރިހަމަކުރުމަށް ލިބިގެންދާނެ ވަރަށް ބޮޑު އެހީތެރިކަމެކެވެ.
