ށ. ފަރޮޅުގެ ގުދުރަތީ ވެށި ހިމާޔަތްކޮށް ބެލެހެއްޓުމަށް ބޭނުންކުރާނެ ހާއްސަ އުޅަނދެއް ގެނެސްފިއެވެ.
“ފަރޮޅު ރޭންޖަރު” ގެ ނަން ދީފައިވާ މި އުޅަނދު ރަސްމީކޮށް ތައާރަފުކޮށްފައި ވަނީ، އެ ސަރަހައްދުގެ ތިމާވެށި މޮނިޓަކޮށް ރައްކާތެރިކުރުމުގެ މަސައްކަތް ހަރުދަނާކުރުމުގެ ގޮތުންނެވެ.
މިއީ އެންވަޔަރަމެންޓް މިނިސްޓްރީން އިސްނަގައިގެން، އިންޓަނޭޝަނަލް ޖަމާއަތްތަކުގެ އެހީތެރިކަމާއެކު ހިންގާ “ކެޓެނޭޓް” ޕްރޮޖެކްޓުގެ ދަށުން ހޯދި އުޅަނދެކެވެ. މި މަޝްރޫއަކީ ރާއްޖޭގެ ނާޒުކު ތިމާވެށި ދެމެހެއްޓެނިވި ގޮތެއްގައި ބެލެހެއްޓުމަށް ކުރިއަށްގެންދާ މުހިންމު މަސައްކަތެކެވެ.
ތިމާވެށި ރައްކާތެރިކުރުމުގެ މުހިންމުކަން ފާހަގަކުރައްވައި، މިނިސްޓަރު ތޯރިގު އިބުރާހިމް ވިދާޅުވެފައި ވަނީ މިފަދަ ވަސީލަތްތަކުގެ ސަބަބުން ގުދުރަތީ ވެށި ހިމާޔަތްކުރުމަށް ކުރެވޭ މަސައްކަތްތަކަށް ބޮޑު ކުރިއެރުމެއް ލިބިގެންދާނެ ކަމަށެވެ.
އަދި މި އުޅަނދާއެކު ރޭންޖަރުންގެ ޓީމުން ވަރަށް އަވަހަށް އަމަލީ މަސައްކަތް ފަށާނެ ކަމަށް އެންވަޔަރަމެންޓް މިނިސްޓްރީން ބުންޏެވެ.
ފަރޮޅަކީ ގުދުރަތީ ގޮތުން ގިނަ ސިފަތަކެއް ލިބިފައިވާ މުއްސަނދި ސަރަހައްދަކަށް ވާއިރު، މި އާ އުޅަނދާއެކު އެ ތަން ބެލެހެއްޓުން އިތުރަށް ފަސޭހަވެގެންދާނެއެވެ.
