ދިއްލީގެ ހައިކޯޓުން ވަނީ ބޮލީވުޑްގެ މަޝްހޫރު ކޮމެޑީ އެކްޓަރު ރާޖްޕާލް ޔާދަވް 3 މަސްދުވަހަށް ޖަލަށް ލުމަށް ހުކުމްކޮށްފިއެވެ.
މި ހުކުމް އައީ އޭނާ ދޫކުރި 9 ކްރޯޑް ރުޕީސްގެ ޗެކްތަކެއް ބައުންސްވި މައްސަލައާ ގުޅިގެންނެވެ. މި މައްސަލައަކީ 2010 ވަނަ އަހަރު ރާޖްޕާލް އަމިއްލައަށް ޑައިރެކްޓްކޮށް ނެރުނު ފިލްމު “އަތާ ޕަތާ ލާޕަތާ” އަށް ފައިސާ ހޯދުމަށް ނެގި 5 ކްރޯޑް ރުޕީސްގެ ލޯނަކާ ގުޅިގެން އުފެދުނު މައްސަލައެކެވެ. ފިލްމު ފްލޮޕްވުމުގެ ސަބަބުން ލޯނު ނުދެއްކި، އިންޓްރެސްޓްއާ އެކު ދަރަނި ވަނީ 9 ކްރޯޑަށް އަރާފަ އެވެ.
ބައުންސްވި 7 ޗެކެއްގެ މައްސަލާގައި ރާޖްޕާލް ޔާދަވް 3 މަހަށް ޖަލަށްލުމަށް ހުކުމްކޮށްފައިވަނީ އިއްޔެއެވެ. ޝަކުވާ ހުށަހެޅި ފަރާތަށް ޖުމްލަ 7.35 ކްރޯޑް ރުޕީސް ދެއްކުމަށް ކޯޓުން އަމުރުކުރި އިރު މި ފައިސާ ނުދައްކައިފި ނަމަ އިތުރު 6 މަހުގެ ޖަލު ހުކުމެއް އަންނާނެ އެވެ. މި މައްސަލައިގައި ރާޖްޕާލްގެ އިތުރުން އޭނާގެ އަންހެނުން ރާދާ ޔާދަވް ވެސް ކުށްވެރިވެ، 5.5 ލައްކަ ރުޕީސް ދައްކަން ވަނީ އަމުރުކޮށްފައެވެ.
