ރާއްޖޭގެ ދަނޑުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް، މިހާތަނަށް ރާއްޖޭގައި ދަނޑުވެރިންނަށް ދެވޭ އެންމެ ކުޑަ ރޭޓު ކަމުގައިވާ އަހަރަކަށް %6 ގެ ރޭޓުން ފައިނޭންސް ލިބޭނެ މަގުފަހިވެއްޖެއެވެ. މި ފައިނޭންސިން ފޯރުކޮށްދެނީ ފިޝަރީޒް މިނިސްޓްރީ އާއި އެސްއެމްއީ ޑިޖިޓަލް ގުޅިގެން ހިންގާ “ދަނޑުވެރި ނަފާ” ސްކީމްގެ ދަށުން، އިސްލާމީ އުސޫލުތަކާ އެއްގޮތަށް އަލުން ބައްޓަންކޮށްގެންނެވެ.
މި ފައިނޭންސިންގެ ދަށުން އަމިއްލަ ފަރުދުންނަށާއި ވިޔަފާރިތަކަށް ރަހުނަކާ ނުލައި 500،000 ރުފިޔާއާ ހަމައަށް ފައިސާ ލިބޭނެއެވެ. އަދި ރަހުނު ބަހައްޓައިގެން 1،000،000 ރުފިޔާއާ ހަމައަށް ފައިނޭންސް ލިބުމުގެ ފުރުސަތު ވަނީ ހުޅުވާލާފައެވެ. މި ފައިސާ އަނބުރާ ދެއްކުމަށް 10 އަހަރުގެ ދިގު މުއްދަތެއް ލިބޭއިރު، އޭގެ ތެރޭގައި 12 މަސް ދުވަހުގެ ގްރޭސް ޕީރިއަޑެއް ހިމަނާފައިވާކަން އެސްއެމްއީ ޑިޖިޓަލުން ވަނީ ހާމަކޮށްފައެވެ.
އެސްއެމްއީ ޑިޖިޓަލްގެ ސީއީއޯ ބަދުރުއްދީން ހަސަން ވިދާޅުވީ، މި ފައިނޭންސިންގެ މައިގަނޑު ބޭނުމަކީ ކުދި ވިޔަފާރިތައް ހަރުދަނާކޮށް، ދަނޑުވެރިކަމުގެ ސިނާއަތް ފުޅާކުރުމަށް ދަނޑުވެރިންނަށް ބޭނުންވާ މާލީ އެހީތެރިކަން ފަސޭހައިން ފޯރުކޮށްދިނުން ކަމަށެވެ. ޒަމާނީ ޓެކްނޮލޮޖީ ބޭނުންކޮށްގެން ހިންގާ ދަނޑުވެރިކަމުގެ މަޝްރޫއުތަކަށް ހާއްސަ އިސްކަމެއް ދީގެން ފޯރުކޮށްދޭ މި ފައިނޭންސިންއަށް އެދި ހުށަހެޅުމުގެ ފުރުސަތު، މިހާރު އެސްއެމްއީ ޕޯޓަލް މެދުވެރިކޮށް ހުޅުވާލާފައިވެއެވެ.
