އަންނަ އާދީއްތަ ދުވަހު ކުޅުމަށް ހަމަޖެހިފައިވާ ‘އެލް ކްލަސިކޯ’ މެޗުގެ ކުރިން، ވިނީޝިއަސް ޖޫނިއާ ކާމިޔާބުކުރި ދެ ލަނޑާއެކު ތާވަލުގެ އެއްވަނައިގައި އޮތް ބާސެލޯނާއާ ވާދަކުރުމުގެ ފުރުސަތު ރެއާލް މެޑްރިޑުން ދަމަހައްޓައިފިއެވެ.
އާދީއްތަ ދުވަހު އެސްޕަންޔޯލްއާ ބައްދަލުކުރި މެޗު ރެއާލުން 2-0 އިން ކާމިޔާބުކުރިއިރު، ދެ ލަނޑުވެސް ފެނިގެންދިޔައީ މެޗުގެ ދެވަނަ ހާފުގައެވެ. މި މޮޅާއެކު، ލީގު ތަށި ހޯދުމަށް ރެއާލުން ކުރަމުންދާ މަސައްކަތަށް ވަނީ އިތުރު ދިރުމެއް ލިބިފައެވެ.
މިމެޗުގެ ފުރަތަމަ ލަނޑު 55 ވަނަ މިނެޓުގައި ވިނީޝިއަސް ކާމިޔާބުކުރީ ގޮންޒާލޯއާ އެކު އުފެއްދި ރީތި ކޮމްބިނޭޝަން ކުޅުމަކަށްފަހު، އެސްޕަންޔޯލްގެ ދެ ޑިފެންޑަރުން ކައިރިން ނައްޓާލުމަށްފަހު ފޮނުވާލި ހަމަލާއަކުންނެވެ. އޭގެ 11 މިނެޓު ފަހުން، ޖޫޑް ބެލިންގްހަމް ފަހަތު ފައިން (ބެކްހީލް) ދިން ހިތްގައިމު ބޯޅައެއް، ވިނީޝިއަސް ވަނީ އެއްފަހަރުން ޖަހައި ގޯލުގެ މަތީ ކަނަށް އަމާޒުކޮށްލާފައެވެ.
މި މެޗުގައި ރެއާލްގެ މުހިންމު ބައެއް ކުޅުންތެރިން ކަމަށްވާ ކީލިއަން އެމްބާޕޭ، އާރްދާ ގުލާ، ތިބޯ ކޯޓުއާ އަދި އެޑާ މިލިޓާއޯ ނުކުޅެއެވެ. އަލްވާރޯ އާބެލޯއާގެ އިރުޝާދުގެ ދަށުން ކުޅުނު ރެއާލުން މެޗުގެ ބޮޑުބައި ކޮންޓްރޯލް ކުރިއިރު، މެޗުގެ ކުރީކޮޅު ވިނީޝިއަސް ފޮނުވާލި ބޯޅައެއް ގޯލުގެ އަރިމަތީ ދަނޑީގައި ޖެހި ވަނީ ބޭރުވެފައެވެ. ރެއާލުން މެޗު ކޮންޓްރޯލް ކުރި ނަމަވެސް، ލަނޑު ޖަހާނެ ސާފު ފުރުސަތުތަކެއް އުފެއްދުމަށް މެޗުގެ ބޮޑުބައިގައި އެޓީމަށް ވަނީ ދަތިތަކަކާ ކުރިމަތިވެފައެވެ.
ލީގުގައި ބާކީ ހަތަރު މެޗު އޮތްއިރު، ތާވަލުގެ އެއްވަނައިގައި ބާސެލޯނާ އޮތީ 88 ޕޮއިންޓާއެކުގައެވެ. ދެވަނައިގައި އޮތް ރެއާލް މެޑްރިޑާ ދެމެދު މިހާރު އޮތީ 11 ޕޮއިންޓުގެ ފަރަގެކެވެ. އަންނަ ހަފުތާ ބަންދުގައި ކޭމްޕް ނައޫގައި ކުޅޭ ކްލަސިކޯ މެޗުން ބާސެލޯނާ މޮޅުވެއްޖެނަމަ، ޖެހިޖެހިގެން ދެވަނަ ފަހަރަށް އެޓީމަށް ލީގު ޗެމްޕިއަންކަން ކަށަވަރުވާނެއެވެ.
ރެއާލުން މި ހޯދި މޮޅާއެކު ބާސެލޯނާގެ އުފާފާޅުކުރުންތައް ހަފުތާއަކަށް މަޑުޖެހިފައިވީ ނަމަވެސް، އަންނަ ހަފުތާގައި އަމިއްލަ ދަނޑުގައި ވާދަވެރި ރެއާލް ބަލިކޮށް ލީގު ކަށަވަރުކުރުމުގެ ފުރުސަތު ބާސެލޯނާއަށް އެބައޮތެވެ.
