ސިއްހަތާއި ޢާއިލާއާއި އިޖުތިމާޢީ އެހީއާ ބެހޭ ވުޒާރާއިން އާންމުކުރި ތަފާސްހިސާބުތަކުން ދައްކާގޮތުން، މިދިޔަ މަހު އެ ވުޒާރާއަށް ހުށަހެޅުނު މައްސަލަތަކުގެ ތެރެއިން އެންމެ ގިނައީ ކުޑަކުދިންނަށް ކުރާ އަނިޔާގެ މައްސަލަތަކެވެ. އެގޮތުން ޖުމްލަ 92 މައްސަލައެއް ވަނީ ރިޕޯޓުކޮށްފައެވެ.
ކުޑަކުދިންނަށް ލިބޭ އަނިޔާތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުގެ މައްސަލަތައް ކަމަށް ވުޒާރާއިން ފާހަގަކުރެއެވެ.
އިހުމާލުވުން: 24 މައްސަލަ
އަނިޔާގެ އަމަލެއް ފެނުން/ދެއްކުން: 19 މައްސަލަ
ޖިސްމާނީ ހާނިއްކަ: 18 މައްސަލަ
ޖިންސީ ހާނިއްކަ: 13 މައްސަލަ
ނަފްސާނީ ހާނިއްކަ: 6 މައްސަލަ
ޖިންސީ ގޮތުން “ގްރޫމް” ކުރުން: 5 މައްސަލަ
އެހެން ކުދިންގެ ފަރާތުން ލިބޭ ގަނާ: 2 މައްސަލަ
އިންޓަނެޓް މެދުވެރިކޮށް ގްރޫމް ކުރުމާއި ބަދުއަހުލާޤީ ވީޑިއޯ: 2 މައްސަލަ
އެހެނިހެން: 3 މައްސަލަ
ކުޑަކުދިންނަށް ކުރާ އަނިޔާގެ މައްސަލަތަކަކީ ސީރިއަސް މައްސަލަތަކެއް ކަމަށް ބަލައި، ކަމާ ގުޅުންހުރި އިދާރާތަކާ ގުޅިގެން ފިޔަވަޅު އެޅުމުގެ މަސައްކަތް ވުޒާރާއިން ދަނީ ކުރަމުންނެވެ. އަދި އަނިޔާގެ ޝިކާރައަކަށްވާ ކުދިންނަށް ބޭނުންވާ ރައްކާތެރިކަމާއި އެހީތެރިކަން ފޯރުކޮށްދިނުމަށް ވެސް ހާއްސަ މަސައްކަތްތަކެއް ދަނީ ކުރެވެމުންނެވެ.
އަމާން މުޖުތަމައެއް ބިނާކުރުމަށްޓަކައި، މިފަދަ މައްސަލަތައް މަދުކޮށް، ދަރިވަރުންނާއި ކުޑަކުދިންގެ ރައްކާތެރިކަން ކަށަވަރުކުރުމަކީ މި ވުޒާރާގެ އެންމެ އިސް އެއް އަމާޒެވެ.
