އާ ޑިފެންސް މިނިސްޓަރުގެ މަގާމަށް، ހަސަން ރަޝީދު މިއަދު ރައީސް މުއިއްޒު އައްޔަންކުރައްވައިފިއެވެ. މި މަގާމަށް އޭނާ އައްޔަންކުރައްވައި، މަގާމުގެ ފަތްކޮޅު ދެއްވުމަށް ބޭއްވި ރަސްމިއްޔާތު އޮތީ މިރޭ ރައީސް އޮފީހުގައެވެ.
މި ރަސްމިއްޔާތުގައި، ހަސަން ރަޝީދު ވަނީ މިނިސްޓަރުންގެ މަޖިލީހުގެ މެންބަރުކަމުގެ ހުވައި ކުރައްވާފައެވެ. އޭނާއަށް ހުވައި ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމްއެވެ. ހުވައި ކުރެއްވުމަށްފަހު، މިނިސްޓަރު ވަނީ ހުވައިގެ އިގުރާރުގައި ސޮއިކުރައްވާފައެވެ.
ރައީސް އޮފީހުން ބުނީ މި އައްޔަންކުރެއްވުމަކީ ސަރުކާރުގެ ކެބިނެޓަށް ގެންނެވި ބަދަލުތަކުގެ ތެރެއިން ކުރެއްވި ކަމެއް ކަމަށެވެ. ޑިފެންސް މިނިސްޓަރުގެ މަގާމާ ހަވާލުވެވަޑައިގަތުމަށްފަހު، ހަސަން ރަޝީދު މިރޭ ވަނީ ރައީސް އޮފީހުގައި ބޭއްވި މިނިސްޓަރުންގެ މަޖިލީހުގެ ބައްދަލުވުމުގައިވެސް ބައިވެރިވެވަޑައިގެންފައެވެ.
