ރާއްޖެއިން ބޭރަށް ކިޔަވަން ދިއުމަށް ބޭނުންވާ “ރިކޮގްނިޝަން” ލިޔުން ހޯދައިދޭނެ ކަމަށް ބުނެ، ބައެއް ފަރާތްތަކުން ދަރިވަރުންގެ އަތުން ބޮޑެތި އަދަދުތަކުން ފީ ނަގަމުންދާތީ އެކަމަށް ސަމާލުވުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން އަންގައިފިއެވެ.
އެމްކިއުއޭއިން މިއަދު ނެރުނު ބަޔާނެއްގައި ބުނީ، ބޭރަށް ކިޔަވަން ދިއުމުގެ ކުރިން ދަރިވަރު އިޚްތިޔާރުކުރާ ކޯހަކީ ރާއްޖޭގެ ގައުމީ ސަނަދުގެ އޮނިގަނޑަށް ފެތޭ ޕްރޮގްރާމެއްކަން ކަށަވަރުކޮށްދޭ “ރިކޮގްނިޝަން އޮފް ދަ އިންޓެންޑެޑް ޕްރޮގްރާމް” ލިޔުމަކީ އެ އޮތޯރިޓީން އެއްވެސް ފީއަކާ ނުލައި މުޅިން ހިލޭ ދޭ ޚިދުމަތެއް ކަމަށެވެ. ނަމަވެސް، ތިންވަނަ ފަރާތްތަކެއް މެދުވެރިކޮށް މި ލިޔުން ހޯދަން މަސައްކަތްކޮށްގެން ދަރިވަރުންނަށް ބޮޑެތި މާލީ ގެއްލުންތަކެއް ވަމުންދާކަން ފާހަގަކުރެވިފައިވާ ކަމަށް އެ އޮތޯރިޓީން ބުންޏެވެ.
މިގޮތަށް އަމަލުކުރުމުގެ ސަބަބުން ބައެއް ދަރިވަރުންގެ “ސްޓޫޑެންޓް ވިސާ” ހަމަނުޖެހި، ކިޔެވުމަށް ބޮޑެތި ހުރަސްތަކެއް ކުރިމަތިވަމުންދާ ކަމުގެ ޝަކުވާ ލިބެމުންދާ ކަމަށްވެސް އެމްކިއުއޭއިން ބުންޏެވެ. މި ލިޔުމަކީ ދަރިވަރުންގެ ކޯސް ބަލައިގަތުމަށާއި ލޯނުގެ ފުރުސަތުތަކަށް އެދުމަށް އެންމެ މުހިންމު އެއް ލިޔުމެވެ.
އެމްކިއުއޭއިން އިތުރަށް ބުނީ، މި ލިޔުން ހޯދުމަށް އެދޭ ދަރިވަރުންނަށް އީމެއިލް މެދުވެރިކޮށް ނުވަތަ އެ އޮތޯރިޓީއަށް ހާޒިރުވެގެންވެސް ފޯމު ހުށަހެޅޭނެ ކަމަށެވެ. އެހެންކަމުން، އެއްވެސް ފަރާތަކަށް ފައިސާ ދިނުމުގެ ބަދަލުގައި، ސީދާ އެ އޮތޯރިޓީ މެދުވެރިކޮށް މި ޚިދުމަތް ހޯދުމަށް ހުރިހާ ދަރިވަރުންނަށް ވަނީ އިލްތިމާސްކޮށްފައެވެ.
