ފ. ފީއަލީ ބަނދަރުގައި އޮތް ތެޔޮ ބޯޓެއްގައި މިއަދު ހެނދުނު ރޯވި އަލިފާންގަނޑު ކޮންޓްރޯލުން ނެއްޓި ފެތުރުމުގެ ސަބަބުން، އެ ރަށު މަސް ދޯންޏެއްގައި މަސައްކަތްކުރާ ބިދޭސީއަކު ވަރަށް ބޮޑަށް ފިހިއްޖެއެވެ. މި ހާދިސާގައި ފިހުނު މީހާއަށް އެ ރަށު ސިއްހީ މަރުކަޒުގައި މިހާރު ދަނީ ފަރުވާދެމުންނެވެ. ފުލުހުން ބުނި ގޮތުގައި މި ހާދިސާގެ ރިޕޯޓު ލިބިފައިވަނީ މިއަދު ހެނދުނު 09:15 ހާއިރުއެވެ.
މި ނުރައްކާތެރި އަލިފާންގަނޑު ފެތުރިގެން ގޮސް ބަނދަރުމަތީގައި އޮތް އިތުރު ތިން ދޯންޏަކާއި، ރަށުގެ އައިސްޕްލާންޓްގެ އިތުރުން ފިއުލް ޝެޑަށް ވެސް ވަނީ ބޮޑެތި ގެއްލުންތަކެއް ވެފައެވެ. ރަށުން ވާހަކަ ދެއްކި މީހަކު ބުނީ އައިސްޕްލާންޓާއި ބައެއް ދޯނިފަހަރުގައި އަލިފާން ރޯވެ ބޮޑު ބައެއް އަނދާފައިވާ ކަމަށެވެ. އަދި އަލިފާނުގެ ސަބަބުން އުފެދުނު ބޯ ދުންގަނޑު މުޅި ރަށު ތެރެއަށް ފެތުރެމުންދާތީ، ރައްޔިތުންގެ ސަލާމަތަށްޓަކައި ރަށު ސްކޫލުގެ ކިޔެވުން ވެސް މިހާރު ވަނީ މެދުކަނޑާލާފައެވެ.
އަލިފާން ނިއްވުމުގެ މަސައްކަތުގައި އެމްއެންޑީއެފްގެ ފަޔަރ ފައިޓަރުންނާއި، ފުލުހުންގެ އިތުރުން ރަށުގެ ގިނަ އަދަދެއްގެ ރައްޔިތުން ދަނީ ހަރަކާތްތެރިވަމުންނެވެ. ނަމަވެސް ތެޔޮ ބޯޓެއްގައި ރޯވުމުގެ ސަބަބުން އަލިފާންގަނޑު ނިއްވާލުމަށް ބޮޑެތި ގޮންޖެހުންތަކެއް ކުރިމަތިވަމުންދާ ކަމަށް މައުލޫމާތު ލިބެއެވެ. މިއީ ފީއަލީގެ ތާރީހުގައި ވެސް ހިނގި މިފަދަ އެންމެ ނުރައްކާތެރި އެއް ހާދިސާއެވެ.
