ހިޔާ ފްލެޓްތައް ފަދަ ސޯޝަލް ހައުސިން މަޝްރޫއުތަކުގެ ދަށުން ދޫކޮށްފައިވާ ތަންތަން ކުއްޔަށް ދިނުން ހުއްޓުވުމަށް ހުރި ގާނޫނީ ހުރަސްތައް ނައްތާލުމަށް ގާނޫނަށް ބަދަލު ގެނައުމުގެ މަސައްކަތް ސަރުކާރުން ފަށައިފިއެވެ. މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބު ވިދާޅުވީ، ހިޔާ ފްލެޓްތަކަކީ “ސޭލް-ޕާޗޭސް” އެގްރީމެންޓެއްގެ ދަށުން ދޫކޮށްފައިވާ ތަންތަން ކަމަށްވާތީ، އެފަދަ ތަންތަނާ މެދު ފިޔަވަޅު އެޅުމުގައި މިހާރު ގާނޫނީ ގޮތުން ދަތިތަކެއް ހުރި ކަމަށެވެ.
މިނިސްޓަރު މުއްތަލިބު ފާހަގަކުރެއްވި ގޮތުގައި، ގިނަ ފްލެޓްތަކެއް ބޮޑު އަގުގައި ކުއްޔަށް ދޭ މައްސަލަ ފެންމަތިވުމާ ގުޅިގެން އެކަން ހުއްޓުވުމަށް ސަރުކާރުން އަންނަނީ ހާއްސަ މަސައްކަތްތަކެއް ކުރަމުންނެވެ. އެގޮތުން، އެގްރީމެންޓްތަކުގައި ކުއްޔަށް ނުދެވޭނެ ކަމަށް މިހާރުވެސް ބަޔާންކޮށްފައި އޮތް ނަމަވެސް، ސޯޝަލް ހައުސިންގެ އަސްލު މަގްސަދު ހާސިލުކުރުމަށްޓަކައި ގާނޫނީ ގޮތުން އެކަން އިތުރަށް ސާފުކޮށް ކަނޑައަޅަން ޖެހެއެވެ. “ރެންޓް-ޓު-އޯން” މޮޑެލްގެ ދަށުން ދޫކޮށްފައިވާ 4،000 ފްލެޓާ މެދު ފިޔަވަޅު އެޅުން ފަސޭހަވި ނަމަވެސް، ހިޔާ ފްލެޓް ފަދަ ތަންތަނަށް ގާނޫނީ ބަދަލެއް ބޭނުންވާ ކަމަށް މިނިސްޓަރު ވިދާޅުވިއެވެ.
މީގެ އިތުރުން، ފްލެޓްތައް ލޭބަރ ކުއާޓަރުގެ ގޮތުގައާއި ކެއްކުމުގެ މަސައްކަތް ކުރާ ތަންތަނުގެ ގޮތުގައި ބޭނުންކުރާ މައްސަލަތައް ބަލައި، އެފަދަ ތަންތަން ހުސްކުރުމުގެ މަސައްކަތް އެޗްޑީސީން ކުރާނެ ކަމަށް މިނިސްޓަރު ވިދާޅުވިއެވެ. ފްލެޓް ކުއްޔަށް ދޭކަން ރިޕޯޓްކުރެވިއްޖެ ނަމަ ނުވަތަ ފާހަގަކުރެވިއްޖެ ނަމަ، ފުރަތަމަ މަރުހަލާގައި ޖޫރިމަނާކުރުމަށްފަހު އިސްލާހުވުމަށް ފުރުސަތު ދެވޭނެއެވެ. ނަމަވެސް، ބޮޑު އާއިލާއަކަށް ކުޑަ ފްލެޓެއްގައި ނޫޅެވޭ ފަދަ ހާއްސަ ހާލަތްތަކުގައި، ހުއްދައެއް ނަގައިގެން ކުއްޔަށް ދިނުމުގެ ފުރުސަތު ދިނުމާ މެދު ކުރިއަށް އޮތް ތަނުގައި ވިސްނިދާނެ ކަމަށްވެސް މިނިސްޓަރު ފާހަގަކުރެއްވިއެވެ.
