ރާއްޖޭގެ ޓޫރިޒަމް ދާއިރާއިން ލިބުނު ޓެކްސް ނުވަތަ ޓީޖީއެސްޓީގެ އާމްދަނީއަށް އައި ބޮޑު ކުރިއެރުމާއެކު ދައުލަތުގެ މާލީ ހާލަތު ވަރުގަދަވެއްޖެއެވެ. ފިނޭންސް މިނިސްޓްރީން އާންމުކުރި މާލީ ރިޕޯޓުގައިވާ ގޮތުން، މި އަހަރުގެ ފެބްރުއަރީ 26ގެ ނިޔަލަށް ޓީޖީއެސްޓީގެ ގޮތުގައި 2.3 ބިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 39.4 ޕަސަންޓުގެ އިތުރުވުމެކެވެ.
ދައުލަތަށް ލިބުނު ޖުމްލަ އާމްދަނީއަށް ބަލާއިރު، މި އަހަރުގެ މިހާތަނަށް 7.8 ބިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 29.3 ޕަސަންޓުގެ ކުރިއެރުމެކެވެ. އާމްދަނީ އިތުރުވުމުގެ ސަބަބުން ދައުލަތުގެ ބަޖެޓުން 1.9 ބިލިއަން ރުފިޔާގެ ސާޕްލަސްއެއް ވަނީ ރެކޯޑުކުރެވިފައެވެ. މިދިޔަ އަހަރުގެ މި މުއްދަތުގައި ސާޕްލަސްގެ ގޮތުގައި ހުރީ އެންމެ 98.2 މިލިއަން ރުފިޔާކަން ފާހަގަކޮށްލެވެއެވެ.
މި މުއްދަތުގައި ދައުލަތުގެ ޖުމްލަ ހަރަދުތައް އެއްވަރެއްގައި ހިފެހެއްޓިފައިވީ ނަމަވެސް، މުވައްޒަފުންގެ މުސާރައަށް ކުރާ ހަރަދު ވަނީ 9.6 ޕަސަންޓު އިތުރުވެފައެވެ. މި ބަދަލު އައީ ސަރުކާރުގެ ޕޭ ހާމަނައިޒޭޝަން ސިޔާސަތުގެ ދަށުން މުސާރަތަކަށް ގެނައި ބަދަލުތަކުގެ ސަބަބުން ކަމަށް ފިނޭންސް މިނިސްޓްރީގެ އޮފީހުން ބުންޏެވެ. އަދި ދައުލަތުގެ މާލީ ރިޕޯޓު ނެރުން ލަސްވީ އެކައުންޓިން ނިޒާމަށް ގެނައި ބަދަލުތަކުގެ ސަބަބުން ކަމަށްވެސް އޮފީހުން ބުންޏެވެ.
