ބ. ގޮއިދޫގައި ކެންސަރު ބަލި ޖެހޭ މިންވަރު އިތުރުވަމުންދާ މައްސަލަ ދެނެގަތުމަށްޓަކައި، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާ ގުޅިގެން ހާއްސަ މަސައްކަތްތަކެއް ފަށާފައިވާ ކަމަށް އެގްރިކަލްޗާ މިނިސްޓްރީން ހާމަކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު މަރިޔަމް މާރިޔާ ވިދާޅުވީ، ގޮއިދޫގައި ބަލިތައް ގިނަވާ ސަބަބުތައް ހޯދުމަށް އެމްއެފްޑީއޭ އިން މިހާރު ޓެސްޓުތައް ކުރަމުން އަންނަ ކަމަށެވެ. މި މައްސަލަ ސަރުކާރުގެ ސަމާލުކަމަށް އައީ، އެ ރަށުގެ ދަނޑުވެރިކަމުގައި އިންސާނުންގެ ފުރާނައަށް ނުރައްކާވާ މިންވަރަށް “ޕެސްޓިސައިޑް” އާއި އެކި ބާވަތުގެ ކެމިކަލް ބޭނުންކުރާ ކަމުގެ ކަންބޮޑުވުން އާންމުން ފާޅުކުރުމާ ގުޅިގެންނެވެ.
ގޮއިދޫއިން އާންމުވި މައުލޫމާތުތަކަށް ބަލާއިރު، 500 އެއްހާ މީހުން އުޅޭ އެ ރަށުން ފާއިތުވި ފަސް އަހަރު ތެރޭގައި ނުވަ މީހަކަށް ކެންސަރު ޖެހި، ތިން މީހަކު ވަނީ މަރުވެފައެވެ. ގިނަ ދަނޑުތައް ބިދޭސީން ބަލަހައްޓަމުންދާއިރު، އުސޫލުތަކާ ހިލާފަށް ކެމިކަލް ބޭނުންކުރުމުގެ ސަބަބުން ކާނާ ތަޣައްޔަރުވަމުންދާ ކަމަށް އާންމުން ބުނެއެވެ.
މިނިސްޓަރު އިތުރަށް ވިދާޅުވީ، ޕެސްޓިސައިޑް ބޭނުންކުރުމާ ގުޅޭ ގާނޫނީ އޮނިގަނޑެއް އޮތް ނަމަވެސް، އެކަން ތަންފީޒުކުރާނެ ޕޮލިސީތައް ހެދުމުގެ މަސައްކަތް މިދިޔަ މަހު ފަށާފައިވާ ކަމަށެވެ. އަދި ވަރަށް އަވަހަށް މި ޕޮލިސީތައް ތަންފީޒުކޮށް، ދަނޑުވެރިކަމުގައި ކެމިކަލް ބޭނުންކުރުން ހަރުދަނާ ގޮތެއްގައި ކޮންޓްރޯލް ކުރެވޭނެ ކަމަށް އުއްމީދު ކުރައްވާ ކަމަށް ވެސް މިނިސްޓަރު ވިދާޅުވިއެވެ.
